陳柏宇冇眼紅唔需要戥我唔抵
陳柏宇（Jason）即將舉行慶祝入行十周年演唱會，雖表明屆時不會騷肌及求婚，但透露會跟大家講心底話，更預告可能會真情流露感動到喊！有「樂壇隱世高手」之稱的Jason亦不愛比較，直言成功感並非來自外界認同，豁達的他認為做人要知足。
歌手陳柏宇將於本月下旬在九展舉行三場演唱會，對於門票被「秒殺」，Jason開心之餘亦有點受寵若驚：「自己對賣票期望冇擺到咁高，我嘅成功感唔係嚟自門票幾快被搶購或開幾多場，而係過程中我哋有幾用心去做、演唱會之後領悟到啲乜，我唔想開心與否係嚟自外界畀我嘅認同或成績。」
「唔話你知就係驚喜」
問到演唱會可會為歌迷送上驚喜？他故作神秘笑說：「唔話你知就所有嘢都係驚喜。（會唔會騷肌？）唔會，唔想變咗賣弄呢啲。（求婚？）係極度冇可能！好想保留番一啲淨係我哋兩個先知嘅浪漫。」Jason希望今次會為大家帶來一個開心兼窩心的演唱會，他亦預告會講心底話，問到可會忍唔住喊？他笑說：「有機會會，有機會唔會，因為我估唔到情緒會點，可能突然間會好感動、激動，開演唱會情緒係會澎湃啲。」
累積經驗再等機會
談到同期出道的周柏豪甚至後輩吳業坤都已登上紅館，被網友稱為「樂壇隱世高手」的Jason坦言不愛比較：「紅館唔係我終極目標，唔係我歌唱事業一定要達到嘅一件事，好多比我唱得好嘅人都可能未必有我咁好彩開到三場演唱會。（但好多人戥你唔抵。）唔需要戥我唔抵，我依家係開心。世事唔係咁諗，尤其歌手呢行，好多時係講緣分，我嘅緣分畀到我嘅嘢係好。」其思想豁達，與世無爭，Jason亦坦言：「要識得欣賞自己生活，識得知足，依家緣分只可以畀我開到九展咪開九展，有機會已經好好，如果做一場紅館同三場九展比，我梗係攞三場九展嘅經驗，到我再累積多啲經驗先去做（紅館）都唔遲。」
服裝：Fred Perry
Stylist：Queenie Yu
場地：HMV Bar & Restaurant
文：音樂組
攝：李柏儒