蕭正楠逞英雄 田蕊妮險中掌

蕭正楠(Edwin)與田蕊妮前晚為新劇在跑馬地街頭拍攝打戲,一身懷舊薯仔Look上陣的Edwin,見到冼灝英被圍毆,即挺身出手相助,在旁的阿田驚到眼都凸埋,混亂間Edwin更險些兜掌打到阿田臉龐,嚇得她即時尖叫。

近日忙於拍攝無綫新劇《超時空男臣》的田蕊妮與蕭正楠,前晚到跑馬地街頭拍攝,同場還有冼灝英。當晚10時許,Edwin穿上一身類似李小龍於《唐山大兄》中的戲服,再加上超薯髮型造型,充滿復古味。

現場所見,Edwin與阿田經過該處大廈後巷,見冼灝英被十多名大漢追打圍揼,路見不平的Edwin即化身正義超人,拔刀相助,在旁的阿田睇到打鬥場面驚到眼都凸埋,擘大個口得個窿,混亂間Edwin差點兜掌打落阿田面上,阿田被其掌風嚇得當場尖叫。貴為視后的阿田七情上面交足戲,十分專業。

吔薯片睇Play Back

每當拍完一個場口,二人即走到導演身旁睇Play Back,阿田更拎住薯片邊食邊睇。其後不用埋位的阿田,在Edwin拍攝打交戲「搏緊命」時,趁空檔獨自到附近便利店Shopping再添置零食。咪睇阿田身材瘦猛猛,原來都幾食得吓!

文、攝:追蹤組