陳國峰小登科兄弟接辣蕉
無綫藝人陳國峰昨日舉行婚宴，一眾「兄弟幫」齊齊助他接新娘，既扮女人，又跳石春路，之後更要應付姊妹團的「蕉」數和芥辣侍候。幸好呢班兄弟向來做得、玩得、搞笑得，一對新人開心之餘，連國峰外父、外母都開心到咀嘴。
陳國峰與太太黃思雅昨晚舉行婚宴，早上一班兄弟團、《兄弟幫》眾主持浩浩蕩蕩陪新郎接新娘，當中包括梁烈唯（唯唯）、范振鋒（阿范）、林盛斌（Bob）、吳業坤、謝東閔等，眾兄弟過五關斬六將，分別要踏石春墊、扮女人，還要硬啃「辣招」！一眾兄弟被玩之餘也不忘玩人，除要求新人旋轉咀足二十秒外，更成功叫外父、外母咀嘴。
石春墊上跳舞
到開門利是這一關時，兄弟們要戴假髮、化濃妝，還身披流蘇三點式，Bob扮女人自然駕輕就熟，唯唯則不停送飛吻，一臉傻氣的謝東閔就最有「女人味」。而罕有扮女人的阿范則笑言對一班最愛扮嘢的兄弟們來說僅是「小兒科」，他謂：「開門利是唔甘，女人衫同假髮亦都係好基本嘢，班姊妹仲安排我哋跳《PPAP》，仲要喺勁尖嘅石春墊上面跳，都唔知喺邊度買番嚟！」而謝東閔、王梓軒更被拍下跳石春墊時神色痛苦一幕，睇見都痛！
鹹竹蜂逐隻吞
阿范又透露最「辣」一關是以芥辣刷牙，他笑謂：「班姊妹要我哋戴住牙套食蕉，仲要舔晒啲Cream，食到想嘔，跟住佢哋好貼心安排我哋用芥辣刷牙，刷完牙再用勁辣漱口水漱口！再嚟鹹竹蜂啫喱，我哋一隻隻咁吞，不過我都頂唔住噴咗出嚟，成隻曱甴咁，嚇到佢哋散晒！」
陳國峰昨晚透露開門利是為$6,999，比最初預算的加了幾千，因當時沒錢在身，要搵兄弟「籌旗」。他笑言希望三年抱兩，最好生仔可以一齊踢波。而吳業坤及阿Bob則互爆甚得姊妹團歡心，Bob指吳業坤遭姊妹集郵及摸臉，吳業坤即謂：「佢哋都有摸你個頭，讚你可愛。」
文：影視組