《吸血新世紀》（Twilight）系列26歲美國女星姬絲汀史釗活（Kristen Stewart）早前受訪時剖白由異性戀變成同性戀的心路歷程，又自言成名完全是個意外。
2008年電影《吸血新世紀》爆紅，除為姬絲汀帶來名氣，亦成就她與拍檔羅拔柏迪臣（Robert Pattinson）的戀情。然而經歷出軌醜聞後，姬絲汀不再愛男人，改為愛女人。她早前受訪時剖白其中心路歷程：「我冇羞恥，亦冇迷惘。啲嘢改變咗，唔係淨係我，依家我哋真係可以做好自己。同男人拍拖時，我隱藏做嘅所有嘢，因為所有個人嘅嘢好似全部都即刻變得唔重要，我唔鍾意咁。當我同女人拍拖時就唔再係咁，我就諗，其實如果隱藏自己，就好似代表我唔接受自己，或者為自己感到羞恥，所以我要改變面對公眾嘅做法。我人生當堂開闊咗，依家開心咗好多。」
姬絲汀自言成名並不在她的計算之內：「我喺洛杉磯長大，由9歲開始參加試鏡。媽媽Jules係個劇本顧問，爸爸係直播電視節目嘅助理導演，所以當我開始演戲時，只係想成為團隊一分子。不過最後都唔成功，我拍咗一部又一部嘅獨立電影，全部都係怪雞嘢。然後《吸血新世紀》出現咗，當時我哋唔知會拍多過一集，但Catherine Hardwicke係導演，我就諗，其實咁都幾型，然後呢個系列就變成完全另一樣嘢。」
不少藝人熱衷打理社交網站，姬絲汀卻從不在網上公開自己：「我唔係反對社交網站，但只係決定唔去參與。我有個同友人聯絡嘅Instagram戶口，但如果要喺社交網站同一大班人打交道？我連電視訪問都唔係幾頂得順。」她自言有五、六個童年好友，她因拍《吸》片一夕爆紅，又經常只與男友在一起，一度與老友失去聯絡，直到她下定決心重新聯絡老友並坦承需要他們，才維繫到友情。
原名：Kristen Jaymes Stewart
生日：1990年4月9日
出道：1999年
職業：演員、模特兒
代表作：《吸血新世紀》系列、《白雪公主之魔幻復仇記》
文：外娛組