稱帝冇「萬歲」累事？ 陳展鵬拍打戲撼枱角 左耳爆缸縫六針
無綫小生陳展鵬與緋聞女友胡定欣再度合作拍劇，這對「同命鴛鴦」卻先後受傷！定欣早前弄傷腳，而展鵬昨日拍動作戲時傷及左耳流血不止，要入院縫針兼停工。展鵬受訪時報平安並笑說：「可能攞咗視帝未有時間請食飯！可唔可以安排停廠畀我請食飯？保保平安！」
陳展鵬與胡定欣被指拍攝《城寨英雄》時打出愛火花，在新劇《同盟》中「照辦煮碗」，監製文偉鴻安排他們在劇中「埋身肉搏」，打出真感情！昨日凌晨時分，二人齊齊開工拍攝打鬥戲，但傳出展鵬左耳受傷流血不止，更要送院縫六針，暫時須停工休息兩天，令劇組擔心不已。
停工兩日多撻疤
展鵬受傷原因傳出多個不同版本，有指他與定欣對打時，定欣不慎扯甩其耳環，惟展鵬昨午接受電話訪問時說：「出咗院，邊有咁誇張呀！唔關定欣事，唔係好嚴重啫！唔緊要，男人有疤型啲呀！其實係我打觔斗時唔小心撼咗埋枱角受傷，醫生建議縫針好啲，監製就叫我休息兩日，多謝大家關心！」昨午他如常外出做運動，精神狀態似乎不錯。
不如停廠保平安！
展鵬坦言新劇動作場面危險度較《城》劇高：「今次又刀又槍，同埋要打巴西柔術，傷頸及傷骹嘅機會較高，作為演員知道觀眾鍾意睇，梗係想繼續拍啦！其實開鏡到依家我都親身上陣冇用替身，拍出嚟好睇嘛！（就住定欣嚟拍？）我哋默契一定要好好，一定要知力度喺邊！」見完紅就要「攞彩」，問到是否有信心台慶再奪視帝？他笑說：「講講吓，會唔會係因為我喺新加坡攞完視帝，返嚟未有時間請大家食飯，所以要我出血呢？不如停一日廠，等我有時間請餐飯，為大家買個平安啦！」
至於監製文偉鴻受訪時表示「案發」時並不在場，事後從工作人員口中得知事件，他說：「佢兩個都係『塘水滾塘魚』喇！佢哋對打戲好多，巴西柔術又要互相扭鬥，嚟緊應該要改改啲動作設計，再整親受傷就唔好啦！」他又透露原定明天拍攝定欣與展鵬一場重頭戲，安排二人打出真感情繼而接吻，但如今相信要暫時告吹，他笑說：「總之呢場戲開唔到，定欣要對展鵬『負責任』囉！」而定欣昨晚在微博留言「呵番」展鵬：「你要好好休息，快點好番，放心……我會幫你請過一個保鏢，以後我就負責斟茶遞水買飯，想食咩，即管開聲……」另外，近日忙於拍劇的定欣日前趁不用開工，與助手到銅鑼灣Shopping。定欣入店內極速逛了一會後，已揀了大堆靚衫往試身室慢慢試。逗留20分鐘後，她購下心頭好，未幾見助手替她拿着大袋戰利品離開，雙雙步往附近停車場。最近春風滿面的定欣見到記者拍照時，即望向鏡頭笑笑口打招呼，心情靚爆！
文：影視組