草蜢開騷蔡一智當老婆面咀女
組合草蜢前晚假會展舉行拉闊音樂會，陳奕迅與太太徐濠縈、關心妍夫婦、黃佩霞、蔡一智太太等到場支持。當草蜢唱到《偷偷看》時，三子與四位性感女dancers大跳辣身舞，期間蔡一傑（傑仔）跨在女dancer身上，意識大膽，而蔡一智（阿智）亦未埋太太周雪芳在場，除了摸女dancer的大髀外，更與對方嘴對嘴錫錫！之後四位肌肉男dancers出場，傑仔與其中兩位半裸男dancers身貼身，大玩人肉三文治，更掀開外套騷肌露點，場面火辣！
嘉賓陣容超強
音樂會的嘉賓陣容鼎盛，邀得天后楊千嬅、王菀之、鄭欣宜、江海迦、C AllStar等共十二組單位合作演出，其中蘇志威更一人獨享Super Girls五位美女，與她們邊唱《100樣可能》邊跳貼身舞，艷福不淺！受訪時，草蜢表示特意邀請一班他們欣賞的年輕一輩音樂人合作，感激大家百忙中抽時間到來。阿智被問到太太事前可知他會與女dancer咀嘴？他詐傻笑說：「係咩？有咩？好似冇排過，我唔知佢知唔知，但係關乎個音樂氣氛問題，佢應該睇得開心嘅！」
傑仔在演唱親自創作的《媽媽》時感觸落淚，他表示一投入演唱，眼淚就忍不住標出來：「我寫呢首歌嘅時候喊咗兩次，都隔咗段時間，估唔到仲會喊，諗起媽媽真係好感觸，仲畀你哋影到添，原本我諗住好有型o架！」
文：音樂組