盧凱彤移居台北搵番生活步伐

Ellen近日回港四出宣傳自資專輯，已移居台北的她坦言心情輕鬆及愉快，雖然仍靠藥物控制躁鬱症，但台北生活步伐非常適合自己。問到再次返港宣傳，擔不擔心情緒受影響？她說：「依家仲食緊精神科藥物，控制得好好，情緒方面冇乜問題。」隨即解釋為何堅持去台灣，她說：「我想平衡番情緒，如果成日喺香港會崩潰，壓力太大喇！喺台灣心態輕鬆啲，節奏又慢啲，會覺得搵番生活步伐。」

自資出碟蝕硬

Ellen在台北閒時會到咖啡店睇足全日書，她說：「或者成個禮拜冇乜做嘢只係睇戲，Hea吓去吓公園，步伐好似啱自己，可以抖一抖再返香港拚搏。」回復自由身的她承認自資出唱片預了血本無歸：「自資出碟要用大筆錢，喺呢個年頭出碟預咗蝕，係靠未來做騷，出一啲產品賺番，網上賣歌平台都有微薄收入。」

異地戀冇問題

問到會否與台灣男發展戀情？Ellen笑說：「你又知我冇？（即係有？）我冇講，呢啲嘢隨緣啦。」經常返港工作及探雙親的她又說：「唔會覺得係異地戀，依家咁方便，香港同台灣個半鐘頭飛機。」問到會否在台北置業？Ellen說：「我嘅事業未有咁成功，我喺香港已經供緊樓。」

文：音樂組

攝：劉斌