鄧穎芝自資出歌極速回本

歌手鄧穎芝（Vangie）相隔五年推出新歌《Break It》，早前更自資十萬元拍MV，再次走回音樂道路，Vangie竟以「奇怪」來形容今次推出新歌的心情：「好奇怪，好耐冇試過出新歌做宣傳，好耐冇喺香港出席公開活動，覺得自己格格不入。（上台唱歌感緊張？）拍MV就有，因為呢幾年我都有返內地登台，我都儲咗好多舞台經驗。因為MV我係一手一腳搞，都擔心拍嘅前一晚瞓唔到。」

表現真我嫌寸

談到新歌的主題，Vangie說：「自從經歷咗《G-1格鬥會》，更加發覺做自己人哋係唔鍾意，因為喺個節目入面我表現出好真，但人哋覺得我好寸，大家覺得做藝人講嘢係要包裝，我覺得唔係，所以唔係要活喺大家嘅框框下。」問到這首快歌能夠回本嗎？Vangie說：「呢隻快歌有賺得番喎！因為節目出街後，我都多咗收入，依家可以打個和。」

鄧穎芝近年多在內地登台，坦言拍MV緊張過上台演唱。

鄧穎芝親自接Job，總算收支平衡。

帶男友見家長

面對市道不景氣，Vangie自資出歌雖然困難重重，但她仍樂在其中，更慶幸還有工作機會：「我由2011年開始冇經理人幫，咩都自己搞，其實係辛苦嘅，但我好享受。之前我一個月都有四、五個登台，今年係幾個月先有一次，不過好在香港依家多番嘢做，可以幫補吓。」

問到Vangie與圈外大隻男友發展得如何？她甜絲絲說：「了解中。（點識？）遊船河認識。（發展機會？）有。（屋企人見過未？）見過，佢哋話幾大隻。（你鍾意大隻？）都唔係嘅，運動型囉！（唔要花心？）咁梗係啦，呢個好基本！」

場地：Le Rêve

髮型：Lawrence Chan ＠Queens Private-i

服裝：mi-tu

文：專案組

攝：吳文聰