陳法蓉50歲牛一 孤零零買珠寶氹自己
現年50歲仍然享受單身生活的陳法蓉，上周生日當天，見她孤獨現身中環，雖然半百人生情路曲折，生日冇情人相伴，但總有方法氹自己開心，見她步入珠寶店試完手鏈又試頸鏈，未幾已買下生日禮物送給自己。
貴為1989年香港小姐冠軍的陳法蓉，出道以來不乏富豪公子追求，但自從2009年與「空殼前度」朱明甩拖後，身邊一直未見有新男友登場，不經不覺已踏入50之齡，身邊女友人紛紛嫁人兼做了媽媽，連同屆的梁佩瑚亦成功標尾會嫁出，剩下她仍然獨來獨往，平日只靠弄狗為樂，連上周正日生日亦隻身行街。
不停飯局慶生
當日下午4時多，全身白色打扮，襯埋白色厚底鞋及小白襪的她皮膚白皙，身材美好，完全看不出已達半百之齡。陳法蓉入到商場徑直行去珠寶店，細心挑選一輪，在店內試完手鏈又試頸鏈，似乎想趁生日買禮物逗自己開心，經過半小時左拼右拼後，終於揀啱心水，買了幾件心水首飾，滿意地離開。
買完首飾，陳法蓉再往附近名店揀新裝，人逢喜事特別疏爽，只見她幾乎每行一間店舖都有收穫，買得相當盡興。雖然生日只得自己孤零零行街，其實陳法蓉於圈中人緣甚廣，近期和朋友慶祝生辰的照片幾乎鋪滿其微博，所以就算單身，亦一點不覺空虛。
文、攝：追蹤組