姚子羚胡蓓蔚呻胡定欣最難約
「胡說八道會」驚爆內訌？快將生日的胡蓓蔚昨日出席活動時大呻慶生派對難約齊好姊妹，更直指有人冇記性，約好日子但問完又問，令她勁火滾！同樣本月生日的姚子羚更點名指胡定欣最難約，實行唔預她先搞飯局。
姚子羚、胡蓓蔚和鄧佩儀等昨日在將軍澳電視廣播城出席「十一月星辰」活動。同屬「胡說八道會」的胡蓓蔚和姚子羚，分別在本月12日和21日生日。問到如何慶祝？胡蓓蔚即「唉」了一聲，並大呻：「依家約食飯同度期做嘢冇分別！」更笑指通訊群組有人「發瘟」，經常問完又問飯敍日子，令她睇到「嬲嬲豬」。
齊人係最好禮物
姚子羚則指胡定欣近期忙拍劇最難約：「胡杏兒都今個月6號生日，搵次三個一齊搞咗先。」並指三位壽星女都想各自請一次食飯，胡蓓蔚聞言即說：「多個機會飲醉。」
兩人指好姊妹黃智雯好有心，已買了巨型蛋糕，胡蓓蔚更笑指若開不成派對，打算叫老公單立文帶該蛋糕返公司逼同事食。問到老公有何表示？胡蓓蔚指上月是相識20周年，叫了單立文送手袋：「咁啱杏兒喺巴黎，佢做買手。」問兩人送了甚麼禮物給杏兒？她們均指杏兒「咩都有」，胡蓓蔚說：「諗到頭爆，要整手作仔，但其實齊人嚟就最好。」
文：影視組