何浩文包麥明詩食一世寸爆林作
藝人何浩文日前被拍得在鰂魚涌睇舖位及親力親為搞裝修，事後他大爆豪擲七位數開餐廳，問到會否送折扣給緋聞女友麥明詩？他豪氣表示想請她食一世免費餐，擺明冧爆對方：「佢肯過嚟港島幫襯就入我數！」
藝人何浩文（Dominic）事業發展順暢，早前他決定「撈多瓣」開自家食店！日前他被拍得在鰂魚涌睇舖位兼落手落腳搞裝修，只見他步入正進行裝修的地舖，又向在場工人指指點點。他不斷用手機拍下現場布置，更除下行裝推動手推車，擔擔抬抬忙個不停。而他在舖位「驗貨」一輪後，終於放心離場，出門時更被女粉絲捕獲及要求合照，有求必應的他盡顯親民一面。
從商維生 演戲追夢
其後Dominic發現記者兼接受訪問，問到是否重金打造新店？他說：「我同幾個朋友每人夾七位數開日本餐廳。（對飲食業有信心？）有！人不外乎衣食住行！（想轉型從商？）我想雙線發展，從商係維生，演戲係追夢！」他又稱日後會到舖頭下廚展身手。
十年免費餐閒閒地146萬
問到有否向緋聞女友麥明詩送上餐廳折扣卡？他甜笑稱樂意請她食一世免費餐，擺明冧爆對方：「Close朋友就入我數啦！（佢嚟食就長期免費？）佢住九龍，肯過嚟港島幫襯就入我數！（請佢食一世？）可以咁講。」Dominic許下如此豪氣的承諾，假若麥明詩日日幫襯，每次埋單約四百元，食足十年就總共食到146萬免費餐，認真和味！再問到若麥明詩帶林作來食，會否同樣免費？他搞笑說：「若果一啲有頭有面嘅新朋友，我都會請，但要睇係咪有頭有面先啦！」Dominic努力搵銀，希望將來的另一半可以齋享福「唔使做」！
文：影視組