非常心痛好姊妹 Stephy：佢好堅強

吳雨霏承認曾小產，三位好姊妹楊愛瑾（Miki）、鄧麗欣（Stephy）和區文詩坦言知悉時跟Kary一樣難過。日前才宣布大肚的Miki，對好友Kary小產一事，她回覆本報時說：「發生呢件事冇人會開心，身為好朋友更覺心痛，呢段時間夫妻互相支持最重要，而我亦會無限量支持佢哋，希望大家能給予佢哋多啲空間。」而Stephy說：「事情發生後我係知道，同Kary一樣非常難過，嗰一刻我哋可以做嘅就只有陪伴同支持，曾經都擔心佢情緒同健康，但佢一直表現得非常堅強，而且佢和Brian（洪立熙）處事好成熟，係正能量嘅人，一齊牽手度過呢個難關！」Stephy指Kary現時已重新投入工作，希望她可以放鬆心情，最重要健康快樂。