蕭正楠教精陳凱琳放．戲先得

堂澡開工 見唔慣大「長」面

數數手指，陳凱琳與蕭正楠至今已合作三套劇集包括《名門暗戰》、《巨輪II》及《翻生武林》，難怪已建立一定默契，即使拍攝時有阻滯也會互相鼓勵，未會出現負面情緒。兩人拍攝《巨輪II》時一齊上山下海「共患難」，蕭正楠說：「今次去咗好多地方拍攝，澳門、沖繩等有好多難忘嘢！記得拍嗰陣係冬天，大家見陽光普照但其實我哋係超級凍，未埋位要着好厚嘅羽絨！有場戲喺山頂拍，着住啲好薄嘅衫，大西洋嘅寒風就兜口兜面吹埋嚟，我就着住件恤衫，佢就着住條薄紗裙，大家都凍到唔想落車！好彩工作人員準備咗啲朱古力、熱咖啡畀我哋暖身。」陳凱琳聞言即和應：「我哋可以話共過患難。」

畀人呃落水凍到震

論最難忘，蕭正楠指是一場在沖繩拍攝的落水戲，憶起仍滋味在心頭：「冬天跳海、夏天拍古裝，呢套都要喺沖繩落水叫做祼泳，一落水凍到成個人冰晒！對白過咗十幾秒先講到，咁啱仲要嗰日翻大風，真係凍到成個人震晒，未試過咁凍。」陳凱琳則玩踢爆：「好記得未跳落去之前已經做足準備，又祈禱希望唔好咁凍，落到去又真係唔係好凍！我仲鼓勵阿蕭話唔係好凍，快啲跳落嚟，但係佢跳咗落嚟感覺同我講嘅係兩回事，阿蕭話點解咁凍嘅，你呃我！」

拍劇歷時往往很長，夏天焗汗拍古裝，冬天捱冷落水屬家常便飯，但拍攝「流流長」總有樂趣地方。陳凱琳自言在沖繩大開眼界增長見識，蕭正楠即反踢爆：「嗰場戲講你衝入男澡堂嗰場，裏面十幾廿個男人都係得塊毛布仔遮住重要部位，有啲仲做戲做全套，塊布仔仲跌埋落地！佢哋係日本人，喺男澡堂咁係正常嘅，佢可能又唔知我哋尺度有限，哈哈！唔知你有冇見過咁多『動物』，你都冇乜幾何可以入到咁嘅地方拍戲，哈哈。」陳凱琳坦言被大「長」面嚇得花容失色：「真係冇遮o架！我真係好驚唔知望邊到。以為佢哋打晒底唔會有嘢穿崩，但入到去突然間見到個屁股，點解會咁o架？」

捧高踩低 最緊要信自己

陳凱琳在《巨輪II》的演出評價有讚有彈，被吳岱融強姦一幕更成為話題，背負很大壓力，她說：「有建設性嘅意見會聽，自己好想進步，但係唔好處係太上心！聽完會唔開心，但係唔開心都要解決，阿蕭都有鼓勵我，佢話自己最清楚有冇進步，要睇番有咩位可以做得仔細啲，角色層次點樣可以做得好啲，要去鼓勵自己，下套劇畀人睇有進步！嗰陣同阿蕭拍緊《翻生武林》，唔想畀呢個情緒影響，繼續開開心心去做，效果唔會差得去邊。」

「邊個初出嚟冇捱鬧」

蕭正楠在圈中經歷起跌，相信最有力的以過來人身份來開解陳凱琳，他說：「有邊個初初出嚟冇畀人批評！有建設性就聽，善意批評會接納。有啲唔合理嘅意見，聽咗上埋心係冇意思，你又唔開心，對件事又冇幫助，部戲又已經拍咗出嚟！你又要面對新工作，帶住唔開心嘅心情嚟做新工作都唔會做得好，所以叫佢放低晒所有嘢，做好自己嘅嘢，人哋一定睇到你嘅努力。我由歌手到演員，十幾年，一定有高低，有捧到你上天，亦有踩到你貼地，自己都幾番上落，好多呢啲感受！呢十幾年學識咗信自己，如果有已經唔需要同人交代！如果做足晒所有嘢，但係天時、地利、人和夾唔埋，咁咪下一套囉！總有一日你嘅角色人哋會鍾意。」

親熱演出 另一半更明白

陳凱琳與「視帝」鄭嘉穎熱戀中，蕭正楠則與「BB」黃翠如人前人後愛得甜蜜，兩人的另一半是圈中人，會否令到拍攝親熱戲有所顧慮？陳凱琳說：「可能咁啱我哋男女朋友都係圈中人，反而會更加知道呢啲係做戲、劇情，反而會更加明白唔會有包袱。我同阿蕭又熟咗，今次拍親熱戲唔會有尷尬。」她反戥男仔拍親熱戲慘，因為通常要半裸上陣，蕭正楠指靠自然發揮：「我就冇乜尷尬，《巨輪II》裏面嗰場親熱戲，講一對男女熱戀中，第一晚有啲好激情嘅嘢發生，聽完導演講解，就盡量去發揮。」

後記：重拾笑女光彩

劇集早前已出街，陳凱琳的演技備受網民猛烈抨擊，一向EQ甚高的她面對口誅筆伐，心情難免也受影響。事過境遷，經一事長一智，她在劇集近尾聲時接受專訪時明顯已經走出困局，回復昔日光彩。

文：影視組