張繼聰勁「葡萄」 爆老婆冧Bosco
藝人黃宗澤（Bosco）、張繼聰、龔嘉欣及劉佩玥等昨日以嘩鬼Look宣傳新劇，阿聰爆老婆謝安琪勁冧Bosco成熟靚仔，自己則被歸類為「搞笑」，即場上演一幕「葡萄」成熟時！
黃宗澤、張繼聰、龔嘉欣及劉佩玥（Moon）等無綫劇《幕後玩家》演員，昨日以嘩鬼造型到屯門黃金海岸出席「《幕後玩家》玩轉萬聖節」，以短打亮相的龔嘉欣不慎露出黑色打底褲，翟威廉晒肌露兩點，孫慧雪則以爛絲襪造型亮相，各有睇頭！
背金句呻辛苦
不過，多次在鏡頭前大晒鋼條身形的阿聰，卻一反常態收起爆肌，更於悶熱天氣下着皮褸示人，未知是否被老婆激親？疑似「葡萄（妒忌）」Bosco的他說：「我老婆睇劇，讚Bosco成熟靚仔。（呷醋？）咁佢都有讚番我演得好搞笑！（做乜着皮褸唔晒肌？）監製叫我哋着衫出席，咁我喺劇中都晒咗肌啦！（網友封你做金句王？）多謝編劇，啲金句唔係我度，我都背得好辛苦。」
恨攞最佳劇集
至於Bosco不但贏得謝安琪欣賞，有網友更重提他與蕭正楠於2003年合作的劇集《戀愛自由式》，當時他是男二，蕭正楠則是男主角，如今二人位置逆轉，網友形容是「Bosco完勝蕭正楠」！對此Bosco說：「人比人，比死人，我夠羨慕佢有黃翠如啦！今次同阿聰、蕭正楠合作好開心。（有信心攞視帝？）冇諗呢方面，反而想個劇攞最佳劇集。」
而劉佩玥對於緋聞男友伍允龍表示冇睇她的劇，她說：「可能佢忙，我唔嬲，唔敢逼佢睇，怕唔夠佢打呀！當初接呢個小三角色，都擔心觀眾唔鍾意，因為同以前演嘅乖乖女唔同，難得大家反應幾好，我好放心！」
文：影視組
