祖兒感激吳雨幫Chur女歌手獎
在英皇娛樂工作15載的行政總裁吳雨宣布退休，昨晚英皇於中環筵開7席為他舉行榮休晚宴，旗下天王天后歌手容祖兒、李克勤、張敬軒、林峯等踴躍出席。英皇集團主席楊受成送上足金金船給吳雨，寓意一帆風順，並表示吳雨離開是英皇的損失，因對方無論在唱片及推廣方面都做得好成功。
最滿足簽到克勤
提到昨日最後一日上班，吳雨笑言：「英皇會照出糧畀我，因為我合約係明年2月先屆滿。」講到最難忘事情，他說：「如果真係要講，最難忘幫容祖兒chur（爭取）獎，有好大滿足感，嗰時每年都幫祖兒chur『最受歡迎女歌星』，爭取咗6、7年，我敢寫包單，日後冇人好似祖兒咁攞咁多獎。」另一開心事是他離開英皇前能簽到李克勤過檔，只是無緣在工作上合作。
祖兒承認吳雨在她事業上有好重要地位，可擔心之後沒人幫她Chur獎？祖兒說：「唔擔心，雖然冇同新CEO（許佩斯）合作過，但希望有新火花。」問到與吳雨的難忘事？祖兒和Twins均說未被他鬧過，祖兒說：「近幾年好珍惜身邊嘅人，同大哥傾多咗偈，交流多咗就發覺佢好多爛Gag，而大哥一行出嚟，係可以鎮住成個家庭，好有氣氛同溫暖。」
林峯大讚好酒腳
林峯則表示加盟英皇後得到吳雨悉心照顧，問有否準備禮物？他說：「在心中啦，等大哥享吓天倫，得閒約吓食飯，大哥係好好嘅酒腳。（有冇難忘事？）最掛住大哥嘅偉論，覺得佢好幽默，每次有大活動都會教我點做，佢又好識講嘢同轉數好快。」問到Twins可有說話感激吳雨？阿Sa說：「之前send咗好長嘅Message畀大哥，佢同我哋啱啱入公司嘅時間差不多，最記得佢喺楊生面前美言咗我幾句，對我好嘅人一定會記住。」而老闆楊受成公布接替吳雨職位的新CEO許佩斯是2002年加入英皇，希望她能秉承吳雨基礎，一路做得更好。
文：音樂組