莊思敏同蕭定一提早解約

莊思敏加盟蕭定一旗下公司多年，早前續約更舉行盛大記者會，原以為雙方關係不錯，昨日她卻突然在社交網留言表示已與公司和平分手，回復自由身！莊思敏昨日現身宣傳活動，自然成為記者追訪焦點，她對此說：「10月已經冇咗約，依家自由身。我想有啲地域性嘅發展，而公司好似比較多音樂方面嘅計劃，唱歌我唔在行。（簽無綫拍劇？）考慮緊，其實一路都有東南亞同內地嘅公司想簽我。」

毋須賠償

不過，據悉莊思敏與蕭定一傾續約之初，已表明很想在影壇發展，當時雙方有共識會在這方面發展，可惜時光飛逝，莊思敏有感未獲兌現承諾，而公司開拍電影，自己多數只得客串角色，令她心灰意冷，幾經考慮後決定提出提前1年解約，獲蕭定一爽快答應，且未有要求作出任何賠償。

莊思敏出席活動後接受電話訪問，被問到是否不滿未能在影壇大展拳腳時，她直認：「比預期係有少少差別，而且公司發展得好快，大家嘅方向真係唔同，我只可以話今次彼此嘅合作唔係right timing（適當時間），咁我哋關係仲好好，算係好嚟好去，唔排除日後仲可能有合作嘅機會。」

「大家好頭好尾」

至於蕭定一回覆記者查詢時，承認雙方已提前解約：「由得佢啦。（雙方達唔到共識？）我都幫唔到佢啲咩㗎啦，等佢自己去搵佢想要嘅嘢啦。（有內情？）唔想講嘞，無謂你一句我一句咁，大家好頭好尾啦。」

文：影視組