麥明詩色誘新歡 斷正搵碇匿

「十優港姐」麥明詩（Louisa）與男友林作拍拖近三年，早前有指她難抵對方的少爺脾氣及撩女仔而陷冷戰，曾承認與男方分手的她還將林作降呢做「朋友」，可惜掟煲唔掟蓋，不時被發現相約外出。

前晚約10時，Louisa趁着萬聖節撇下林作「獨自去偷歡」，悉心打扮兼罕有地大解放！以電影《阿拉丁》中的「苿莉公主」Look現身的她前往大坑的餐廳出席派對，盡騷晒三吋「事業線」兼露腰。性感出擊當然無寶不落，Louisa被發現在開P途中與一名穿上斗篷的黑衫新歡離場！兩人於街頭漫步拍拖，有傾有講多次咬耳仔，嘴角含春的Louisa不時被新歡氹得甜甜笑。及後，兩人在馬路旁玩自拍，男方使出一招「高炒」，Louisa「峰」騷地把身軀靠近齊齊合照。不過當發現記者時，Louisa即一臉尷尬，與男方急急折返餐廳！

撇林作：我哋各有各玩

其後，Louisa換上一身密實打扮，與大班友人齊齊離場，新歡則煞有介事地分道揚鑣，與友人上車離開。取車時，Louisa被問為何不接載新歡時說：「其實係佢媽咪想睇我媽咪本書，咪一齊行去我架車度攞，點知我唔記得攞車匙，所以入番餐廳。」現場所見，Louisa的Tesla座駕車身有一新刮痕，她說：「架車之前花咗攞去整，點知整番好我又唔小心再刮花。」說罷便駕車返歸。

狂歡一晚後，Louisa昨日又出動，今次則與兩女友人現身九龍區的商場行逛。被問到撇下林作性感夜蒲一事，她即時支吾以對，提到與新歡街頭漫步時例牌否認戀情，卻甜絲絲說：「佢係我識咗好耐嘅大學同學，唔係新歡。（會唔會再約番林作慶祝萬聖節？）我哋各有各玩，隨緣啦！」

麥明詩睇住手機喪笑，梗係收到新歡冧爆短訊！	拍拖甜笑 麥明詩與新歡邊行邊傾「蜜」偈，睇佢笑得幾甜！	連體自拍 新歡舉高手機玩自拍，麥明詩即配合挨埋身。

反擊：最憎麥明詩……架車

與Louisa關係撲朔迷離的林作昨日在社交網留言：「I hate Tesla！」而Louisa所駕駛的座駕正是Tesla，似乎暗有所指！事後，林作回應指當時正塞車，碰巧有一架Tesla在前面：「對方個自訂車牌好寸，我想寸番佢啫！我係唔鍾意電動車，但唔係講麥明詩。」

文、攝：追蹤組

終於行埋 麥明詩無懼世事變改，與新歡愈難愈愛……係愈行愈埋先真！	麥明詩與新歡在場內刻意分開影大合照。	麥明詩繼日前撞鐵柱後又刮花愛車。