夏韶聲揀至愛人生交叉點

鄭老師（左）本周四演唱會開鑼，獲夏韶聲擔任嘉賓。

著名填詞人鄭國江（鄭老師）將於10月27至30日假伊館舉行4場「鄭國江45周年名曲．巨星演唱會2016」，更獲林子祥、譚詠麟、鍾鎮濤、汪明荃、區瑞強、夏韶聲及張衞健等20多位歌手擔任嘉賓，陣容鼎盛！鄭老師多年來創作過無數經典作品，至今仍家喻戶曉，但他表示曾覺得一首歌要流行半世紀並不容易：「今年我入行45周年，距離半世紀只係差5年，如果流行半世紀唔係難嘅，依家我就要推前目標，希望首歌係要流行一世紀！」而鄭老師與夏韶聲自1979年的《童年時》開始合作，夏韶聲坦言當初如果沒有鄭老師為他寫的《交叉點》，亦不會有之後的《空凳》出現，他說：「啲人成日問我咁多歌鍾意邊隻，《空凳》我唔係唔鍾意，但因為《交叉點》出咗嚟，有人喺的士聽到，覺得點解呢個人唱得咁慘嘅，就叫我嚟唱《空凳》。」足以證明鄭老師對他音樂事業的影響力！他更透露明年將推出兩張唱片，已決定再次邀請鄭老師為他填詞。

度身造歌

而鄭老師表示會因應不同歌手而寫出不一樣的詞：「唔係佢唱就未必唱到咁孤寂嘅感覺出嚟，嗰時識咗佢之後，有好多次嘅交談，了解佢個人嘅固執同埋硬淨，就寫咗《交叉點》，如果係鄭少秋我當然唔會寫呢首。」夏韶聲即向鄭老師請教：「如果收到隻曲唔好咁點？」鄭老師謂雖然有時旋律不夠動聽，但只要能配上一份合適的歌詞，就能將整首歌提升：「我好多時會寫幾個version嘅詞，大家多數都揀第一個，但唔緊要，咁樣可以訓練思考力，係磨練。」這正是鄭老師的功力所在！

夏韶聲指會再邀鄭老師為他填詞。

區瑞強亦會擔任演唱會嘉賓。

文：音樂組

攝：吳文聰