張繼聰咀女「導」囝囝恨入行
張繼聰、蕭正楠、莊思敏等昨晚出席《幕後玩家》首播飯局，另一男主角黃宗澤未有現身，飯局由阿聰與監製陳維冠埋單！阿聰被問到大肚老婆謝安琪會否黐實電視捧他場？他說：「佢犀利喇，依家係我嘅忠實Fans，連食飯時間都調咗。」新劇中他有不少激咀戲，阿聰搞笑謂「誤導」了兒子張瞻：「都唔係好激烈啫！反而個仔睇咗近期嘅宣傳片（電梯Kiss鏡頭），就問媽咪，佢幾時可以拍戲，可能呢樣嘢誤導咗個仔。」
莊思敏對於網上有傳她輸股票5,000萬元，搞到要「陪瞓」來填氹一事，她說：「好多人傳訊息畀我，有啲係關心我情況，但又有好多人話想仗義相助，話我輸股票要下海，仲有人inbox問我一晚幾錢？我當然冇覆！因為冇咁嘅事！（會唔會發律師信追究？）開頭有呢個衝動，因為傳得太誇張，但我同律師商量過，呢啲網傳好難搵到源頭，我仲睇到個網話招聘作家，所以我都唔使咁認真看待，無謂嘥錢請律師！」
