趁佢病攞佢命！ Jessica爆Aka塞錢入鞋
組合Super Girls昨日四缺一出席「WeWa卡發卡儀式」，其中Heidi、Cheronna及Jessica都大露纖腰，十分吸睛，而Aka則因病缺席。期間她們在台上表演《有事發生》，又跟觀眾玩遊戲及大玩跳舞枚。受訪時，她們表示愛用信用卡，因十分方便，Heidi說：「我之前出Trip去英國，發覺帶信用卡安全啲，因為帶現金喺身好驚畀人偷。」問到一次過碌卡最多碌了多少錢？Yanny表示試過買傢俬花了萬多元，Jessica則大呻最貴是交唱歌堂的學費：「真係好貴！成萬幾二萬蚊，但有十堂。」
Yanny遲找數 賴皮免罰
問到可有欠落卡數？Yanny自爆常忘記找卡數：「啲人打嚟催我交，我會同佢哋講『對唔住，原諒我』，然後就唔使畀罰款，我都覺得自己好賴皮。（係咪因為係藝人先唔使畀？）唔係，喺電話佢唔知我係邊個。」但她亦說：「信用卡有好多優惠，如果善用係好。」
講到她們現時很少帶現金在身，Jessica趁Aka不在場，乘機踢爆她為人亂糟糟：「佢成日將啲錢周圍擺，一打開化妝袋成個袋都係散紙，或者喺鞋會突然搵到啲錢，永遠估唔到佢啲錢放喺邊，佢成日話冇錢，但摷摷下就有錢，所以佢係最需要用信用卡！」講到Aka生病，她們說：「可能天氣轉，佢有發燒，出唔到聲。（會唔會影響你哋下月演唱會？）就係希望佢快啲好番，我哋依家每日都操緊，可能唔夠時間休息，同埋佢應該食多啲有營養嘅嘢。」
文：音樂組
攝：吳文聰