反叛胡琳為中風父覺悟前非

不爭 堅持自我

「爵士小天后」胡琳憑着一顆熱愛音樂的心，在這個充斥着主流音樂的香港樂壇走到第十年。今年她得到前新城知訊台台長朱明銳賞識，重金邀她加盟「理想天映」旗下，並承諾力捧她開紅館騷及攝位做天后，Sing途一片光明！不過，相比起攝上位，她坦言更希望將有自己特色的音樂帶得更遠。

「我本身個人唔鍾意爭嘢，我媽咪成日話我唔上進，我進入第二、三年嘅時候，有認真諗過自己適唔適合呢一行，唱歌我好肯定自己鍾意，但我一開頭好簡單咁去諗，以為唱歌就係唱歌，唔知仲有其他嘢，但我覺得可以做到今年第十年，最終原因都係因為我真心鍾意唱歌。

有機會去紅館開我梗係恨，但你話攝位嗰啲，我唔會咁樣諗囉，我反而覺得依家有好好嘅機會，將我本身嘅音樂事業帶得遠啲，我好希望做到有自己Style嘅一啲嘢，如果用一種去攝或者霸佔咩位置嘅心態去做呢件事，就會變咗畀好大壓力自己，甚至冇咗自己本身嗰樣嘢。」

胡琳希望能做到有自己風格的音樂。	胡琳獲朱明銳賞識，力捧她做天后。	為事業搏殺的胡琳不忘放假「充電」。

嚎哭 唔再嫌棄

當初為追尋音樂夢，胡琳離開定居台山的家人，獨自來港發展，犧牲不少與家人相處的時間，當憶起父親曾中風入院，她亦忍不住聲淚俱下。正因此事，讓她由嫌棄，變到懂得珍惜父母的長氣。

「好慚愧地，少咗好多同佢哋相處嘅時間，五、六年前仲處於一個唔好煩我啦、最好唔好太長時間一齊相處啦，好反叛嘅心態，依家個人真係大個咗、成熟咗，希望可以多啲時間同佢哋一齊，同埋由一個咩都駁嘴駁餐懵，轉變到你講咩我都話好，我都好驚訝自己可以變成咁。

爸爸之前身體唔舒服，中風，嗰時仲要係夜晚，媽咪打電話畀我，佢啲語氣好嬲，話我成日唔理屋企人，跟住有個醫生同我講電話，叫我最好返去睇一睇，因為爸爸昏迷咗，當時我好崩潰，漏夜趕返去，我未試過幾個鐘頭連續喊，喊到豬頭咁，去到太夜冇得探病，跟住又要扮到好堅強，因為媽咪喊，佢一個咁堅強嘅人都變到好驚，所以令我轉變咗。」

胡琳回想當年頂撞父母，不禁落淚。	胡琳2008年曾參演多齣舞台劇。	胡琳學會愛惜父母，特別是他們的「長氣」。

低潮 接濟度日

十年的音樂路並非一帆風順，胡琳曾突然由天堂跌落地獄，整年沒發市，當中的落差令她恐懼，更不得不向現實低頭，向父母尋求經濟援助。

「其實2008年年尾已經開始謝，我記得8月出咗唱片，反應唔錯，7月做咗舞台劇，9、10月又再做，Keep住好忙，但完成晒之後就靜得好犀利，係突然之間，由好充實變到好得閒，嗰刻嘅恐懼好大，好似失業咁！冇收入就唔好出街，但始終要食飯交租，嗰段時間靠父母接濟，講真都咁大個人，會覺得無能為力，會好想好型咁話唔使，但都係要向現實低頭。嗰時心情起起伏伏，成日會同自己打氣，但用晒啲氣去打氣後，你冇嘢做又會謝，成日都匿喺屋企囉，媽咪會叫我唔好做，不如諗吓有冇第二啲嘢想做，我都有諗過，但係冇。好彩2009年年尾我錄四大天王嘅翻唱碟，意想唔到大家好鍾意，由嗰時慢慢建立番個信心，亦都搵到自己音樂嘅方向。」

上進 先公後私

胡琳的感情生活一向低調，亦絕少傳緋聞，在記者追問下，她大方承認蜜運中，但亦非常保護男友，不願透露太多。簽新公司的她有很多工作大計，她指會好好分配時間，不會再戀愛大過天。

「拍咗幾個月，佢係香港人，都算專業人士，之前唔忙嘅時候識嘅，可以話朋友嘅朋友，我諗佢都未必慣，特別我呢排又咁忙，佢都會有微言，希望佢可以體諒，佢本身都忙，但我再忙都好，宣傳期都係一段時間，有時間就會爭取拍拖。

以前會戀愛大過天，做緊嘢嘅時候應該要集中精神，但你個腦掛住拍拖，個靈魂就會飛咗去，我依家就好有上進心，簽咗新公司，有新嘅機會，亦都睇到音樂路可以行得更遠，我會分段處理，可以分配得好啲就好啲，我覺得喺唔影響工作嘅情況下，可以有私人時間做私人事情，但呢段時間重心可能擺多啲喺工作方面先。」

筆錄：戴菲亞

攝：劉斌

化妝：Krisie Wong