傅嘉莉借醉行胸洪永城真空就擒
洪永城與傅嘉莉為新劇拍攝親密戲，洪永城竟毫無防備，僅穿孖煙囪「真空」上陣。對手傅嘉莉借醉行「胸」，被胸壓的洪永城面紅耳熱，一停機即急急穿上長褲，幸未有出現生理反應！講到女友唐詩詠放話想閃婚，洪永城直言不感壓力，直言二人已有共識。
藝員洪永城（Tony）與傅嘉莉（Kelly）昨日於將軍澳電視城拍攝新劇《我瞞結婚了》，劇情講到穿上孖煙囪的Tony，與穿了白色透Bra小背心的Kelly，於暴風雨中酒後亂性，Kelly主動出擊，除了攬實熟睡的Tony外，又胸壓對方耳語，不時又輕摸男方面珠，一臉陶醉，令Tony不禁面紅耳熱。
不過甫停機，一對男女即秒速彈開，Tony急急穿回長褲，晒出招牌傻笑化解尷尬，事後他說：「好驚走光呀，冇打底就上嚟拍，雖然我份人冇底線，但都驚走光呀，擔心觀眾睇到會唔鍾意囉！（拍床戲有尷尬？）冇喎，Kelly比我更放更激情，我係被動配合嘅，大家合作得好好，唔尷尬。」
冇生理反應
為了入戲，Tony亦喝了些酒，說到他面紅耳熱，他說：「我冇面紅，可能你見我畀蚊咬，好正常。（有生理反應？）冇啦！（有冇向女友申報？）唔使啦，做戲啫，我都喺fb講咗拍緊劇，唔驚佢嬲豬囉。」講到女友唐詩詠日前放話會閃婚，Tony說：「冇壓力，我都朝住大家嘅共同方向。（即是有共識結婚？）有共識嘅，但結婚就唔想交代太多，大家好夾，但唔想講太多，將來嘅事冇人知。（有指你同馬國明喺婚宴上爆杯？）邊有爆杯，係碰杯，大家平時都有傾偈。」
同場的Kelly坦言現時單身，拍親密戲沒有避忌，問到怕不怕激嬲唐詩詠？她說：「個問題要交番畀Tony，知佢哋相處好好。」
文：影視組