王君馨拍戲至上結婚冇得傾
藝人王君馨昨日出席活動時，透露現時在美國工作的男友Daniel有意來港發展，可是因語言問題，仍未成功在香港找到一份可發揮的工作，故二人暫時未有結婚計劃，她坦言不會為男友放棄娛樂事業，因此造成彼此間的大問題。
昨日藝人王君馨（Grace）及蘇志威出席東方表行55周年沙田錦標「時尚煲呔賽馬日」媒體發布會，身穿低胸白色連身裙亮相的Grace，透露男友平時不打煲呔，打領呔為主，並稱現在美國銀行工作的他正在香港搵工：「我唔想畀壓力佢，希望佢搵到一份自己鍾意嘅工，始終香港環境、文化同美國唔同。可能語言問題，佢未搵到一份好有發揮及成長嘅工作。」
唔放棄娛樂事業
問到二人有否討論過婚事？跟男友拍拖十一年半的Grace說：「大家都有個諗法，我想佢搵到工，有份工穩定自己先再諗一齊生活，我唔想催佢。」又笑言男友可能應在等她回美國生活：「可能佢會諗當我玩夠娛樂圈，覺得攰就想過平常生活，但我愈做愈熱愛呢份工作，尤其做演員好有新鮮感同挑戰。（你唔會為佢放棄娛樂事業？）呢個係我哋關係好大嘅問題，今次要佢犧牲多少少，到時有家庭，佢係一家之主時，我會做支持佢嘅角色，大家互相遷就。」
蘇志威學打煲呔
蘇志威因經營禮服生意，故對禮服服飾頗有研究：「開始學多咗煲呔、袋巾、恤衫嘅知識，打煲呔對男士好緊要，香港十個男士有八個唔識打。（你學咗幾耐？）唔係好耐，因為我鍾意，所以好快學上手。」他又謂打靚煲呔很有難度，每一個煲呔需時十多分鐘。問到他是否剛榮升為馬主？他表示愛駒名叫「駿王」：「依家仲操練緊，未知幾時出賽。」
文：名人組