李克勤重返無綫 做勁歌王
現年48歲的歌王李克勤趁「四字頭」展開人生新一頁，獲英皇娛樂出天價收歸旗下，更回復「無綫契仔」身份重投無綫懷抱，委以重任主持新節目「超級勁歌金曲」，為收視帶來新刺激。
克勤離開合作30年的環球，以踢開英超都想試吓踢西甲來比喻轉會原因，來到新球會英皇，壓力可會大增？克勤笑言：「因為要跑數？（係一個挑戰？）呢個一定，當一個球員轉咗去新球會，都想踢得好啲，爭取好表現，等啲班主、球迷會喜歡。」
英皇旗下男歌手眾多，有謝霆鋒、古巨基、張敬軒、林峯，似乎競爭很大？克勤認為一間大公司基本上每一個歌手都有自己一片天空：「基本每個歌手都有穩固嘅歌迷層面，各有天空，邊個都踩唔到過嚟。我唔覺得會有任何衝突，最緊要做好自己，呢樣先係對公司應負責嘅角色。」
打造本土節目
身為無綫契仔，克勤終於回歸，更擔大旗主持《超級勁歌金曲》，克勤直言全因對《勁歌》有份情意結：「因為做過《勁歌》主持，有份歸屬感，依家好多人都話唔知《勁歌》幾時播，亦唔知會播咩歌，其實香港音樂節目係咪去到呢個咁嘅地步呢？我覺得唔一定嘅，香港有好好嘅歌手，亦有好好嘅製作團隊，只要大家畀個心去做，係一定做到，想做一個屬於香港嘅音樂節目。」
肩負改革重任
問到請有卡士歌手上節目好難？克勤謂：「我知道好多人眼中一啲上咗岸嘅歌手或者一線歌手都好少喺《勁歌》出現，但好多嘢相輔相成，只要個節目有質素、有分量，我覺得啲有分量歌手唔會拒絕上嚟。（肩負重任？）唔係肩負，只係覺得唔應該變到咁。李克勤身體裏面有一『忽』係《勁歌金曲》而嚟，三次最受歡迎男歌星，亦成就咗李克勤其中一個點。」
文：音樂組
攝：張福宏
場地：Hotel ICON
髮型：Adoph Bow@private