G Cup崔碧珈裸背「界外球」迎擊
擁33C上圍的岑麗香，首次拍電影即有一場群浴戲，眾女齊齊裸背上陣，她雖然首次拍此類戲，但直言零尷尬，亦無意與同場的33C何佩瑜及36G崔碧珈比併身材，而同場加映「晒波邊」的崔碧珈就笑言，對「群浴」很有經驗。
岑麗香首次涉足影壇，拍攝動作電影《辣警霸王花》，片中除了激打連場外，還有一場與崔碧珈、何佩瑜、李元玲及鄭欣宜等「共浴」的沖涼戲，眾女裸背上陣，場面火辣。香香事前做足防走光措施，穿了肉色Tube Top，又指拍攝時一點尷尬也沒有：「呢場係套戲拍到尾聲時拍嘅，所以同幾個女仔都好熟落，再加上場戲唔係Sell Sexy，係Sell姊妹情再加少少美感，好似平時去公共泳池咁之嘛！（覺得邊個身材最好？）個個都好好，各有特色！」
「群浴」經驗豐富
身材豐滿的崔碧珈除了大晒靚背，還側身露波邊，她表示黐了膠紙防走光，又笑言對「群浴」經驗豐富：「細個好鍾意游水，同啲姊妹朋友經常一齊去泳池游水，咁嗰時細個，為咗慳時間會一齊喺同一個浴室入面沖涼。」談到蝦碌事，崔碧珈笑指拍攝期間大家原本傳緊一支洗頭水：「其中有人跣手整跌咗，為咗唔好NG，大家惟有扮繼續傳，好搞笑。」
何佩瑜自認身材差
而何佩瑜談到與眾女「群浴」，哪位身材最吸引時？她謙稱：「我只知自己最差，因為拍呢套戲我操得好犀利，重咗十幾磅，所以應該最差係我。」
另外，有份拍《辣》片的歌手鄭欣宜，忙為本月21及22日在九展舉行兩場的《鄭欣宜女神有問題演唱會2016》排練，早前她到法國拍新歌《懶人包》MV，她又爆導演有畏高症：「我哋喺摩天輪拍嘢，佢上到去面青口唇白。」
文：影視組