唐詩詠向洪永城放話隨時閃嫁

無綫藝人唐詩詠昨日到鑽石山商場出席活動，獲司儀以「不能錯過的女友」介紹出場，這位「絕世好女友」與洪永城拍拖約一年，但Tony已先後與舊愛造型師Bird Tse傳翻撻，又與黃翠如及新劇對手傅嘉莉屢傳緋聞；另邊廂，自詩詠與Tony拍拖後，一直有傳馬國明（馬明）對Tony「看在眼裏」，不甚睇好二人戀情。直至昨日傳出詩詠「契哥」馬明終看不過眼，於楊怡及羅仲謙婚禮上借飲兩杯替阿妹出頭，與Tony針鋒相對，二人更差點碰爆杯！

其實大家又使乜擔心詩詠同Tony，雖然Tony形象花弗、口花花，實情詩詠很愛他，而Tony亦好錫詩詠，就算馬明幾唔鍾意，他倆仍如膠似漆，打風都打唔甩。據詩詠身邊老友透露，向來孝順的詩詠不論之前住九龍塘抑或搬到將軍澳，一直都與爸爸同住，當Tony搬入西貢匡湖居後，與詩詠各有各忙甚少見面，他一直都有叫詩詠搬過去同住，但詩詠不想爸爸獨居，亦打算再睇定啲二人關係，遲遲未決定，不過原來詩詠早前已進駐Tony寓所，搖身一變做女主人，難怪楊怡婚宴當晚兩人同車走。

洪永城有唐詩詠派定心丸，安落晒！	唐詩詠着慣婚紗行騷，真正結婚又會點呢？	唐詩詠對契哥馬國明照顧周到。

護男友夠成熟

詩詠昨日對繪影繪聲的傳聞親自回應，她說：「嗰晚我要做姊妹行嚟行去，冇發現佢哋喺婚宴上有接觸。（傳佢兩個差啲碰爆杯？）好戲劇喎，冇乜可能，洪永城只係話去婚禮好開心，傾咗好多偈。（你離開婚宴時嬲爆爆？）攰啫！做一日姊妹攰過拍劇。（約飯局等佢兩個friend啲？）好耐之前諗過約埋一大班人，後來覺得唔需要咁專登。」

問到詩詠被外界意圖「吹散」，需否透過傳媒公開向Tony派定心丸？她笑言：「我冇嘢同佢講，佢有冇嘢同我講？（佢成日講結婚計劃囉！）我冇聽過。（佢係你Mr. Right？）咁遙遠嘅事留番第時先講。（對佢有保留？）隨緣啦，世事好多變化。（佢唔夠成熟？）又唔好咁話佢，每個人都唔同嘅。（馬明追緊你？）呢個只係一個劇場嚟啫！」

發完嬌嗔後，詩詠又稱接受「閃婚」，似向已做好結婚計劃的Tony隔空放話，她說：「楊怡婚宴嗰晚好多人問我，仲推我去搶花球，我知大家緊張我，結婚係我會做嘅事，但未計劃，我係會突然閃婚嘅人，公唔公布睇到時心情同另一半想法，結婚係自己事，唔需要搞咁多嘢，希望有私人空間。」

「兩兄弟」有偈傾

談到詩詠隔空向他「放風」時，Tony昨日接受電話訪問說：「我唔想回應啦！好多時回應咗就變新聞，我唔想咁樣，希望大家明白。（同馬明差啲碰爆杯？）拍古裝劇咩？《城寨英雄》咁！我同馬明當晚傾咗兩句，都係良好氣氛下，佢做兄弟，我哋有碰杯，但絕對冇傳到咁誇張！」至於馬明則透過WhatsApp回應碰杯一事：「一聽就知流料，大家笑吓就算！」

文：影視組