陳意嵐噴血椅子舞Vs凸眼咕嚕
由藝人方力申、郭偉亮及導演火火擔任評審的ViuTV選美真人騷《美選D.n.A》，前晚播出第二集，各佳麗繼續大騷才藝，其中陳意嵐大跳Chair Dance趷籮兼擘髀，率先進入12強；而崔菲嫣不但唔賣樣，反而醜化自己扮《魔戒》中的「咕嚕」，可愛到爆！
破格選美真人騷《美選D.n.A》前晚播出第二集，一班佳麗使出渾身解數繼續表演才藝，務求取悅方力申、郭偉亮及導演火火三位評審。最先出場的大熱(2)陳意嵐大跳Chair Dance趷籮兼擘髀，令人噴血，事後火火問她：「你覺唔覺喺電視尺度嚟講好大？」陳意嵐即搞笑地說：「唔覺！」結果率先進入12強。至於早已直認整容的(6)趙詠瑤，因勇氣可嘉及爽快，同樣被評高一線，她表演武術後被郭偉亮直接追問：「有冇隆胸？」她亦爽快答有，獲主持大讚。
譚凱倫唔知做乜
至於其他佳麗不乏「蝦碌」場面，表演戲劇的(17)譚凱倫蒙眼出場，其後脫下眼罩及白裙，再跳了一陣子舞，睇到評審搲晒頭，其中火火更全程忍笑，皆因郭偉亮細細聲問他：「戲劇部分係乜？」至於與小方傳緋聞的(5)「沙律」張沛樂，表演魔術時明顯失手，主持亦直呼「睇唔明」，明顯維護她的小方事後受訪時搞笑說：「我明，我當然明，我明佢做錯咗！」而(7)崔菲嫣睩大眼嘟嘴扮電影《魔戒》系列中的「咕嚕」，入型入格！壓軸的(15)馬倩宜則因語調及動靜而被火火取笑為「步驚雲」，但她在表演中畫出黑色眼淚兼倒立，令評審改觀，最終順利進入12強。
文：影視組