胡琳勁冧池石鎮 詐嬌搲上RM

韓國人氣綜藝節目《Running Man》成員池石鎮與胡琳，昨日在港為翻唱張學友和高慧君的國語歌《你最珍貴》拍攝MV。據知今次胡琳成功邀得池石鎮聲援，全因雙方所屬的公司關係好，池石鎮更未有收取任何歌酬，胡琳唱片公司方面只需支付他及同行7人的食宿及機票費約廿萬。

即場清唱國語歌

前日已來港錄音的池石鎮用韓語大讚胡琳非常可愛，又指沒有想過兩人聲音好夾：「我之前有聽過佢唱歌，覺得佢唱得好好，把聲非常靚，又可愛又性感！」問到唱國語歌可有難度？曾翻唱陳奕迅的《重口味》及《無條件》的他，指今次有國語老師在旁指導其發音，更即場清唱一句。有傳RM會再度來港舉行粉絲見面會，池石鎮表示之前曾定下日期，但因各成員工作太忙，所以無奈取消：「之後仲有冇計劃就唔知，非常可惜，我哋都想搞，但咁多個成員好難夾時間。」

胡琳準備了一支「唱K神器」送給池石鎮。	池石鎮表示有意出國語碟，望得到大家支持。	池石鎮未有收取歌酬，可以話是為胡琳義唱。

唱K神器贈Oppa

胡琳準備了一支「唱K神器」送給池石鎮，而池石鎮亦送上高麗人參茶作回禮。胡琳表示一直有留意對方：「我睇RM都有留意佢，成熟穩重係我鍾意嘅類型，可以請佢嚟我真係好開心。（趁機自薦上RM？）等放飯先講，應該會好玩，次次睇我都狂笑，同埋我玩得嘅，夠癲！」胡琳指原以為池石鎮懂國語，因對方唱國語歌時毫無韓國口音：「如果調番轉係我去唱另一種語言嘅歌，我會勁淆底，原來成功真係需要努力！」又笑謂自己只懂3句韓文，所以兩人靠簡單的英文溝通：「佢哋話見到年紀大過你嘅就叫Oppa，我嗌佢Oppa佢就笑。」

文、攝：音樂組