「肩」索阿佘力抗騎呢街霸「青狼」蝦頭硬食心穎飛腳
佘詩曼與一眾好姊妹齊齊以露肩裝對抗曾志偉率領的「騎呢街霸兵團」，志偉化身春麗固然惹笑，「青狼」蝦頭形神俱似，更硬食黃心穎飛腳，認真搶鏡。
阿佘、文頌嫻、周家蔚、鍾麗淇及梁靖琪等前晚錄影無綫節目《我愛香港》，並默契地齊以露肩裝索爆亮相，力抗以「騎呢版」遊戲《街頭霸王》造型現身的主持，其中志偉的「升Cup春麗」造型最搞笑，更被作勢胸襲。而以「青狼」造型現身的蝦頭亦相當忠於角色，頻頻在地上翻滾，更引來黃心穎起飛腳搶fo。
約會小鮮肉？唔話你知
講到一眾姊妹已成家立室，阿佘說：「佢哋分配時間好叻，有啲仲有兩個細路，我就連照顧自己都唔叻，唔好講照顧人。（羨慕佢哋成家立室？）我依家都幾開心！感情事隨緣。（返內地工作有冇小鮮肉約你？）冇諗過呢樣嘢喎，不過有冇約都唔話你知。」
而文頌嫻被指為復出鋪路，她否認傳聞，表示目前將時間與心思放在愛女身上，但坦言有戲癮，待囡囡長大後再考慮。對於阿佘指她因丈夫財務困難的報道而不開心，文頌嫻說：「我係呢行出身，食得鹹魚抵得渴，但報道影埋我個女，講埋學校名，係唔開心。（老公目前財政狀況如何？）冇問題。」
文：影視組