蔡思貝貼錢加戲恨幫王浩信沖涼
藝人王浩信和蔡思貝前日為新劇上堂，飾演盲人律師的浩信以眼罩上陣，全程由「助手」思貝導航。問到思貝會否幫浩信沖涼？浩信搞笑搶白稱不會益對方，思貝則笑言要「貼錢抓涼沖」：「咁我要畀錢請監製幫我加戲！」
無綫小生王浩信前日與蔡思貝到石峽尾盲人中心，為準備拍攝無綫新劇《踩過界》而上課。劇中扮演盲人律師的浩信全程蒙眼，更出動私伙眼罩及「盲公竹」預演角色，除了學習凸字外，又大膽地嘗試蒙眼落街過馬路，誠意十足！而思貝化身「師爺」，特地學習口述影像技巧，以便於劇中協助浩信。
首次合作的二人上堂練習走路時笑料百出，蒙眼的浩信獲思貝帶路，卻不禁笑問：「你會唔會撞死我？」問到思貝在劇中在公在私都要照顧浩信，要否幫對方沖涼？浩信即搞笑地說：「唔會益佢！」思貝聞言便開玩笑稱要搵監製林志華「幫手」：「咁我要畀錢請監製幫我加戲，主動加呢場戲！」
練習扮盲撞親囡囡
其後浩信自爆劇中多艷遇，可惜冇「眼」福：「蔡思貝同李佳芯都明戀我，盲咗先嚟多艷遇，乜都睇唔到，只能夠感受吓！」又揚言將自己交晒畀思貝：「唔得都要得o架啦！撞咪照撞，信任就係咁建立！」他表示於家中亦有閉眼練習當「補鐘」：「喺屋企瞇埋眼行行吓撞到個女，又撞到櫃桶！」至於思貝表示獲老師送上載有口述版本的電影光碟，故要在家閉關煲碟「偷師」。
文：影視組