馬浚偉口花撩阿嬸
藝人馬浚偉、萬綺雯（蚊蚊）及羅敏莊昨日到西九龍中心宣傳舞台劇，身兼編劇、導演及男主角的馬浚偉，與蚊蚊擺出崑曲造手，馬浚偉說：「蚊蚊為個劇學崑曲同華爾滋，大家都拍爛手掌！我哋進行咗總綵排，好感動，心情就似睇住個仔出世，但羅敏莊話綵排啫，未算出世，話我只係見到『雀仔』咋喎！我唔知係咪受劇中角色影響，近日口花花咗，頭先喺停車場，有嬸嬸問我做乜靚仔咗？我話：『唔係點襯得起你！』大家開心，人生就應該咁！」
獲馬浚偉笠高帽的蚊蚊說：「多謝佢同羅敏莊畀信心同支持我。（你有兩個舞台劇喺身？）接《我和春天有個約會》係估唔到有人搵我20年後演番同一角色。（傳胡杏兒擺款被飛出《春天》？）搵演員係主辦單位負責，唔到我加意見，但我初初接劇知有楊怡好開心，佢好sweet，我仲話以後會提佢結婚紀念日，因為嗰日係我生日！」
