麥明詩「問題媽咪」特訓玩嘢！
麥明詩（Louisa），2015年港姐冠軍，會考十優，劍橋法律畢業生，綽號「十優港姐」。她集學識與美貌於一身，好多人（特別是為人父母的）都好想知道十優生是如何培養出來，今次就由「麥太」麥何小娟，與「麥小姐」麥明詩一起拆解十優之路的秘密！
麥明詩：麥小姐、麥何小娟：麥太
麥太：你細個其實好曳。
麥小姐：係！細個好硬頸。
麥太：乖同曳係一線之差，睇吓點教，有時叫你唔聽。
麥小姐：細個我唔叻，覺得哥哥叻啲，哥哥大我三年，口齒伶俐，攞咗好多獎，佢書房入面嘅獎盃排到滿晒，捉棋、跳高、跑步，仲有好多學業獎，嗰時冇諗佢大過我，有啲嘢一定叻過我，可能細個冇乜攞過獎，哥哥咁叻，所以細個時冇乜自信。讀小拔時，個個同學又好勁，細個唔識諗，覺得自己好冇出息，成績只係中游，直至中學時成績先好番。
「讀書好唔好 唔在於分數」
麥太：哥哥性格Social啲，Louisa Cool啲。Louisa天生唔係好叻，記得嗰年考到十優好似有9個人，佢成績一定唔會係全香港最叻一個，考到係恩典，係際遇，我相信60%係先天因子，有啲記性，40%要培養，有啲人唔勤力，或者有啲家長喺不知不覺間將本來叻嘅小朋友壓低咗，由60%減到變咗20%都會，所以教小朋友係要培養，我嘅方法係同仔女多啲傾偈，多啲同佢哋玩，唔敢話方法最好，但可以參考。
麥小姐：不過我常識叻o架！呢樣要多謝你日常生活乜都同我哋講。
麥太：成日聽啲家長話常識科好難，我就冇壓力，我提倡透過生活經驗、玩具去增強子女嘅分析力。
麥小姐：其實細個時，唔明點解你成日問我咁多問題，有次坐火車，嗰時火車同地鐵未合併，你問我火車同地鐵有乜分別。
集齊「4強」自然叻
麥太：有時路面塞車，我會問你點解會塞車？講你睇到嘅塞車原因，如果睇唔到就叫你推理，Brainstorming思考。我覺得讀書好唔好，唔在於分數或用幾多時間，而係在於吸唔吸收，易唔易理解。
麥小姐：我好吸收！我睇書好快，重點好快就記到。
麥太：當觀察力強、專注力、分析力強，綜合能力好，讀書自然叻，睇書就會快。
麥小姐：所以我嘅常識科最強。
麥太：最開心係你常識課外題全部答啱晒，平時都係叫你睇多啲報紙。我要返工，冇時間同其他家長交流，啲家長會互相交換常識科題目，我冇參與，所以冇得分享交流。
麥小姐：唔緊要，但我都答啱晒呀！
狀元試過「肥佬」
十優麥明詩，自然科科都優勝，但她也經歷過「肥佬」，曾經試過默書不合格，會鬧？還是不鬧？麥太主張鬧多於讚，但鬧都要鬧得有技巧，讚也要讚得有重點。
麥太：你梗係有試過唔合格，因為要返工冇睇你手冊，唔知幾時要默書，唔記得咗要溫書。
麥小姐：哈哈！我小息先溫，但考試我就一定記得嘅。
麥太：我覺得當小朋友做得唔好，例如唔合格，要同佢分析邊方面做得唔好，小朋友都想自己做得好，要自小建立佢哋自信心，有時啲家長冇留意到，可能講咗啲唔適合嘅說話，例如「乜你咁唔上進？」、「讀成咁？」、「咁差？」如果個小朋友已經好努力都唔合格，就唔好話佢。但有啲家長就鍾意成日讚小朋友，有時讚得多都會有問題，要留意讚嘅重點，我曾經睇過好多研究，例如有啲家長話：「你今次好叻，媽咪好開心。」視乎個小朋友年紀，如果年紀細嘅小朋友仲可以咁讚，但我自己就唔會用呢個方法，我鍾意用鼓勵方式讚，當小朋友愈大，愈要提升佢嘅能力，唔好為咗令別人開心而去做事。
自信最重要 選華姐輸得起
麥小姐：你都有鬧我。
麥太：我會鬧o架！唔會成日讚，有時仲會刻意鬧，唔可以太自大，要畀啲小挫敗，挫敗同成功，兩種經驗都要有，如果成日讚，自細考第一，成日要喺頂峰，我反而會擔心你會好大壓力，所以華姐選美你輸咗係好事，要輸吓，永遠贏唔係好事。因為我要返工，嗰時請工人照顧你哋，依家你哋都冇手尾，衫又掉到周圍，開燈又唔閂燈，一個人係冇完美嘅。
麥小姐：由細到大你都好鼓勵我自己照顧自己，希望我自己解決問題、有自信心！細個時我做Project，你都刻意唔幫手，其他同學攞到好高分，但我知係佢哋父母做嘅，代表咗連佢哋嘅媽咪都覺得自己小朋友唔掂，所以你唔幫手，係你覺得我掂。同埋自細你就同我講成績唔重要，自信先重要，一時三刻高分數冇意思，訓練我嘅分析力、理解力同埋語文能力，我好認同。
麥太：家長係教育第一身，而唔係老師同學校，希望大家都研究吓，畀下一代小朋友正面思維，社會就上進，會更美好。
麥小姐：你從來都冇催谷過我同哥哥，你要返工，又要教我哋，仲同期修讀兩個碩士，我真係好佩服你，我有句金句「適當嘅方法比起全天候直升機嘅照顧更有效」，如果方法唔適當嘅話，家長用九牛二虎之力都未必達到效果。
文：Tracy Leung
攝：劉斌
場地：Pivo@Elments