吳業坤上得紅館諗定後路

苦苦等待 遙遙無期

不少藝人在娛樂圈浮沉多年，只是為了等待一個發圍的機會，有人會忍不住另謀出路，有人則會繼續默默堅持。「新人王」吳業坤經歷過5年的等待，期間未有想過放棄音樂之路，但久久未能看到目的地，偶爾亦會感到失落。

「其實冇話想放棄嘅，係會灰同心酸，但係冇一樣嘢值得令我放棄，即係我冇遇到挫折，一直嘅路都好smooth，就係太smooth，條路究竟有幾長呢？我未去到阿phil（林奕匡）咁高山低谷，我係覺得好似一條賽道上面有啲人跑得好前，但唔知點先為之係終點或者check point。」

默默耕耘 一朝爆發

坤坤在剛過去的一年成功彈起，橫掃四個樂壇頒獎禮的新人獎項，風頭可謂一時無兩！不少人對他突然爆出的原因都非常好奇，紛紛為這個「吳業坤現象」作出研究，而坤坤亦有閱讀過相關文章。

熱愛唱歌的吳業坤，愛以網上發布方式與歌迷交流。	剛開完紅館騷的吳業坤，感激張智霖擔任嘉賓。	演出劇集《愛‧回家》，可算是吳業坤演藝事業的重要一頁。

「我有睇好多文章，有篇話我可以游走喺電視台同網絡上面，又係喎，我喺電視做《愛‧回家》同主持，跟住喺網絡世界入面，大家又會睇我嘅social media，呢樣嘢就係其中一樣比較獨特之處。其他就係我咩都做咗先，唔理咩result都做咗先，就係呢啲累積落嚟嘅所有嘢，令大家當有個talking point，擸番出嚟嘅時候就會『哦』！原來佢做咗啲咁嘅嘢，點解我唔知嘅，又或者我記得，啲碎片就拼湊番吳業坤。」

於《超級巨聲》嶄露頭角，吳業坤浮沉了五年才爭取到較多機會。	吳業坤曾與龔嘉欣傳過姊弟戀。	被指「偽毒」追女仔，吳業坤只能一笑置之。

高山低谷 未雨綢繆

娛樂圈這行大起大落，要付出努力之餘亦講求際遇，縱使這刻平步青雲，下一刻亦有可能跌入低谷，因此亦令坤坤缺乏安全感。雖然他的事業漸有好成績，但原來他已打算過若未能在娛樂圈發展的最壞打算。

「我樂觀得嚟又悲觀，悲觀就係我會諗好多最壞嘅打算，會諗如果我聽日就畀人收皮嘅話，咁我應該點呢？大不了咪去working holiday囉！會諗呢啲嘢。（幾時有呢個諗法？）任何時候都有，任何時候都幫自己諗後路，冇安全感，你冇得有安全感，你唔係計數，但呢啲係最壞打算啫，最好梗係唱落去，可以開世界巡迴。」

偷偷摸摸 無膽戀愛

在爆紅的同時，坤坤亦惹來不少惡意攻擊，如指他「偽毒」追女仔，並將他塑造為一個「花心男」的模樣，然而坤坤其實私下藏着自卑的一面，加上公眾人物的身份，入行後根本不敢開展一段戀情。

「入行以嚟冇拍拖，會有喜歡嘅人，但都係覺得唔好。係會唔敢拍拖，因為我自己冇安全感，唔知幾時先畀到一啲物質、一啲嘢畀對方，咁不如就唔好開始喇。仲有好多因素，可能會睇到好多新聞，啲前輩可能要偷偷摸摸咁辛苦，冇得做啲正常人可以做嘅事，冇得一齊去旅行，冇得拖手出去，唔可以光明正大去食聖誕大餐，會浪費咗人哋嘅青春，或者呢個關係唔健康，我想可以好自由咁做好多嘢。

「參加《超級巨聲》時一直有交往對象，過咗一年左右就散咗。（原因？）都係嗰啲，或者覺得自己始終冇時間，好想focus落去做一樣嘢嘅時候，就變咗係咁。（你提出？）大家都有共識嘅。諗番起覺得就算係啲咩都可以堅持落去嘛，不過始終人嘅經歷就係咁。」

口述：吳業坤

筆錄：戴菲亞

攝：劉斌

地點：尖東CEO Neway