時尚新貴 歐鎧淳紐約睇騷 着冬裝食雪條
港產「美人魚」歐鎧淳仙氣逼人，奧運雖已完結，但其人氣有增無減，更成為時尚新貴，各大品牌爭相力邀出席活動。前日她應時裝品牌之邀遠赴紐約睇騷，身穿最新冬裝卻食雪條的她獲VIP待遇坐頭排，入完後台見識一番後，她嫌自己不夠瘦，故不會行天橋。
【李詠林、林蔚恩紐約直擊】歐鎧淳在剛過去的巴西里約奧運擔任港隊持旗手，憑着甜美樣子、青春無敵，被網民大讚有仙氣，人氣急升，同時成為時尚界搶手貨。紐約時裝周開鑼，歐鎧淳獲Tommy Hilfiger邀請出席2016年秋季系列，以及設計師Tommy與名模Gigi Hadid聯手設計的Tommy x Gigi系列騷。#TOMMYNOW時裝騷於紐約市南街海港的「Tommy Pier」舉行，現場一如嘉年華，有機動遊戲、摩天輪及小食遊戲。
唔夠瘦難做Model
歐鎧淳穿上最新秋冬裝，食住雪條的她大讚場地布置美輪美奐，她直認首次出席紐約時裝周：「平時都係喺電視睇騷，依家見到名模行騷，行得好快。（打頭陣有Gigi Hadid，鍾唔鍾意佢？）OK。（你腳長試吓行騷？）行唔到咁大步，影相同行騷唔同，未試過。」她有入後台參觀，完全體驗到華麗背後的忙碌：「後台好多人、好亂，但明白show must go on。（退役後，會唔會轉做Model？）我唔夠瘦，影運動衫都唔得，兼職影相就得。」
Taylor化身「龍友」
與型男影星「邪神」湯赫度斯頓（Tom Hiddleston）分手的美國流行樂壇天后Taylor Swift，連日密密風騷外出力證未受情傷困擾，今次孖住模特兒Martha Hunt撐好姊妹Gigi Hadid！Gigi為自己系列親自落場行騷，坐頭排的Taylor表現high爆，一時自拍，一時跟着音樂唱歌，還化身「龍友」拍下Gigi行騷的過程，上載到社交網跟粉絲分享，還留言說為Gigi驕傲，大讚個騷好癲！同場還有前世界小姐張梓琳、中國名模劉雯、模特兒倪晨曦等睇騷。