周柏豪毛毛裝 痕到飛起
周柏豪、林敏驄和陳詩慧等前晚拍攝電影《西謊極落之太爆太子太空艙》，扮演「龍馬」的柏豪因周身毛造型搞到周身痕；至於扮觀音的陳詩慧就坦言會盡量收斂唔講粗口，以免褻瀆神明！
藝人周柏豪、林敏驄、陳詩慧、蔡瀚億（Babyjohn）和林盛斌等前晚於西貢錄影廠以《西遊記》人物造型，為新片《西謊極落之太爆太子太空艙》拍攝，當中柏豪扮「龍馬」、陳詩慧扮「觀音」、蔡瀚億扮「孫悟空」、林敏驄扮演「唐三藏」、林盛斌則扮「沙僧」。
林敏驄唱有味歌
當中柏豪一頭向上梳的髮型，十足小精靈「比比鳥」，穿上白色毛毛裝的他更大呼「周身痕」：「劇情講我哋入咗西方極樂世界，但個毛毛裝搞到我個鼻同口都好敏感。」問到角色是否需要被飾演「唐三藏」的林敏驄騎住？他坦言不用，但笑言整個團隊都被阿驄整蠱：「佢唔係整蠱我，係整蠱成個團隊，例如加對白同唱有味歌。」講到今次唔賣靚仔，柏豪表示沒所謂，因為他甚麼角色都會做。
五花大綁蔡瀚億
首次拍戲的陳詩慧笑言「觀音妝」化足5小時，假髮弄致頸痛，今次更為角色變溫柔，她說：「我比較活潑，劇組叫我換衫後就要收斂，扮神靈就唔好咁多粗口。」蔡瀚億則表示為化身悟空，被工作人員「五花大綁」：「佢哋話悟空好多枷鎖，戲服令我行動不便。（要學悟空周身郁？）吊埋威吔，但着起呢套衫都感覺似吊威吔！」
文：影視組