日前有網友在社交網「讚」張敬軒唱功,發現若將女歌手的歌降Key約兩度後全部變成軒仔把聲,還剪輯了他演繹容祖兒《爭氣》、吳雨霏《愛是最大權利》與盧巧音《落地開花》等的舊片段並留言:「#軒#全部都係軒#全部歌手都係張敬軒扮……」。
贏得2.8萬Like
軒仔未有抗拒「全部都係軒」的「美言」,還力證自己「萬能Key」非浪得虛名,據知他花了一晚「通頂」時間,以「降兩度」的唱腔自製「蛋黃娛樂2016矇查查鉅獻」的MV,重新演繹《爭氣》與《愛是最大權利》等歌曲,一腳踢包辦編、錄、剪,上周六在網上分享後獲網民熱烈支持!直至昨晚8時,MV合共贏得2.8萬個Like、55萬次瀏覽、6,483次分享及2,696則留言,成為其Facebook最熱Po的紀錄。
親製海報整到眼盲
昨日,軒仔加大力度「自抽」,上載新宣傳海報宣布9月7日舉行名為《SINGLANDO GONLANDO係咁升兩度降兩度你畀我唞陣得唔得唧世界無限輪迴演唱會》,列明為「首次三十平台現場Facebook Live原調全宇宙同步直播」,軒仔留言自我宣傳:「年度最有前途升降調新人Singlando Gonlando首個網上直播終於登場」,結果又博得逾4,000個讚!贏Like背後,軒仔亦付出「一擔心血」,砌圖時在沒有繪圖軟件幫助下「逐忽退地退到眼盲」,明白「個樣有白邊」等瑕疵,還望網民「畀個Like唔該」。記者向軒仔所屬的英皇求證,發言人說:「的確有呢個直播,但詳情容後再講。」
文:音樂組