關楓馨湯愛嘉夾擊Fiona

一眾青春無敵星二代關禮傑女兒關楓馨、湯鎮業大女湯愛嘉、林俊賢女兒林鈺洧及鄭丹瑞女兒鄭瑤等齊齊出騷,搶盡同場的歌手薛凱琪(Fiona)風頭!

關禮傑女兒關楓馨、湯鎮業大女湯愛嘉、林俊賢女兒林鈺洧、鄭丹瑞女兒鄭瑤等昨晚難得聚頭齊齊出席唇膏活動,力撼同場的歌手薛凱琪。剛大學畢業的關楓馨及湯愛嘉雖有「星爸」撐腰,但就異口同聲不靠父蔭。關楓馨透露將到澳洲working holiday一年:「適合嘅job都會接,拍戲、拍劇都想試,但唔會叫爹哋搭路,順其自然。」獲家人及男友支持入行的她,被問到能否接受拍性感親熱戲?她說:「冇諗到咁長遠,到時要問爹哋、媽咪同男友。(男友唔畀?)唔知佢肯唔肯,咁都係工作啫。」而在大學讀傳理系的湯愛嘉表示不會叫爹哋幫手入行,想自己試吓,有意在幕後發揮。

林鈺洧唔靠父蔭

至於身材高挑的林鈺洧現以模特兒工作為主,但亦表示想拍戲:「但要學做戲先,未學,搵唔到啱嘅老師。(叫爹哋教?)爹哋忙內地嘅生意,好難。(叫爹哋幫手介紹?)佢冇幫手,想我獨立啲。」她透露其目標是到巴黎行騷,但首要在香港做出成績後才向國際發展。而會否想做Victoria’s Secret女模?她說:「唔會,因為冇咁嘅身材。」

薛凱琪絕冇攣情

同場的歌手薛凱琪則透露剛在越南與台灣女星張鈞甯及陳意涵拍攝新戲,相處近個半月成為好友,三人殺青時都喊住表示不捨:「我之後返香港,張鈞甯叫我去台灣,我即刻飛過去,三個食咗餐飯,我哋拍嘢時仲用情侶杯、情侶帽、情侶瑜伽墊、情侶早餐,三個孖公仔。(會唔會因為咁鍾意女仔?)唔會轉軚鍾意女仔,我好肯定鍾意男仔。」

文:名人組