梁烈唯妻佗B女多謝Bob關照
梁烈唯明年二月升呢做「老竇」！昨日他於社交網宣布喜訊，並公開B女超聲波圖片，唯唯於活動上亦透露好兄弟林盛斌知他快為人父，有錢齊齊搵，「包底」找他做棟篤笑嘉賓，唯唯感恩圖報，笑言會追個仔契給他。
一直盛傳無綫藝人梁烈唯的太太Tina懷有身孕，然而之前因未滿三個月，習俗上不宜公布喜訊。現時Tina已懷孕四個月，唯唯昨日終在社交網宣布好消息，並透露是B女。他上載了B女的超聲波照片，又留言：「跟大家分享一下我的開心事，一個守了一段時間的公開秘密，就是我快要當爸爸了！我們一家上下都非常感恩，上天賜與我們這個很寶貴的禮物，我們家裏要加入一位小女孩了！爺爺、嫲嫲都話要把她寵壞呢！」
作孽太多有報應
唯唯昨日宣傳劇集《為食神探》時，打趣的說：「啲朋友一早話我一定生女。（點解？）因為以前作孽太多！」唯唯又特別多謝林盛斌（Bob），因對方知他快為人父，即關照他做馬來西亞棟篤笑嘉賓。他謂：「大會原本冇預budget請嘉賓，佢話剩低嗰啲錢佢包起。（個金額有幾大？）唔好開數字，等我追個仔契畀佢，要個仔第日對佢好啲。」
而唯唯昨日接受電話訪問，他坦言內心是鍾意仔的，不過現在仔女都開心，希望她健康、快樂成長。他謂：「之前抱朋友啲女已冧到融化咗，不過諗吓第日可以同個仔去踢波都係幾開心、幸福嘅一件事，啲人成日話仔要窮養，女就要富養，咁即係要加倍努力工作搵錢。」
同陳敏之對親家
向來喜歡入廚的他更表示會學整雞酒及小朋友餐單，之後會親自煮給太太補身及小朋友吃。而其好友陳敏之現時亦懷男B，問會否對親家？唯唯謂：「講笑都有咁講，佢個係小王子，我個係小公主，將來小王子就保護小公主，唔一定做情侶，希望將來有個知己、摯友。」
對於唯唯公開致謝，Bob說：「冇所謂啦！知佢有小朋友，都戥佢開心，希望佢多啲唔同種類工作，多啲機會！（多工作周圍飛？）係呀，知佢去唔同地方做嘢，佢係好老公，都希望佢做個好爸爸，依家有個囡，冇得頂！」
文：影視組