阿倫慶生狂食 嘆有入冇出
【戴穎怡澳門直擊】樂壇校長譚詠麟前晚在澳門威尼斯人酒店舉行《譚詠麟40周年巡迴演唱會》，穿上白西裝的他出場連唱多首金曲，雖然左腳韌帶扭傷，仍然落力與舞蹈員勁跳，他搞笑說：「如果你哋發現我今日有啲不良於行呢，係真o既，因為我兩、三個星期前踢波整傷韌帶舊患，但啲飛又賣晒，冇理由唔唱，搞到大家白走一場就唔好意思，所以今日輕輕紮住少少。」歌迷更送上壽桃、鮮花、利是及印有其照片的banner祝賀明日66歲生日的阿倫。
兒子做暑期工創業
完騷後，阿倫換了短褲波鞋，左腳膝蓋紮住的他表示舊患要幾個月才能康復，至於明日生日，阿倫指上月開始已不停吃生日飯：「傷咗仲大鑊，淨係食，有入冇出，以前會跑多啲，依家焗住搵機做，但做唔切o架！」其助手上載了阿倫在後台切生日蛋糕的照片，昨日他又再post慶生照，真係食蛋糕都食飽！
阿倫會與家人食飯慶祝，但在外國讀書的兒子曉風不會返港：「佢做緊暑期工，創業呀。（咩生意？）我亂噏啫。（用你畀佢o既創業基金？）傻傻哋o既，點會話你聽。（問你攞意見？）些少啦。」他又透露新碟籌備了兩年時間，全部都是合唱歌，與Gin Lee（李幸倪）剛錄完一首，其他歌手暫時保密，目前還有一首未錄：「製作時間冇限期，應承唔到公司，因為啲對手都係頂級o既，超忙！」
文：音樂組