張繼聰爆肚 陳家樂狂NG
影星張繼聰在英皇新片《幸運是我》中展現搞笑才華，飾演廚房佬的他挑戰一場兩分半鐘的獨腳戲，即興扮打鼓、唱歌及玩劍擊等，獲劇組大讚表現。甚有搞笑天分的阿聰頻頻出招，在廚房打蛋時竟扮成「高潮樣」，與陳家樂講「包容」時又自加搞笑對白：「咩叫做包容？包皮過長都係包容嘅一種。」
陳家樂笑言與阿聰合作要忍笑，搞到頻頻NG：「張繼聰呢個角色，係一個神經質嘅人。我自問好難忍到笑，佢喺現場仲成日特登引我笑，搞到我頻頻NG；又或者即場爆肚講爛Gag，令我唔知道點樣接落去，我覺得仲大壓力過同小紅姐（惠英紅）做對手戲！」
該片日前獲邀參加「中國金雞百花電影節」、「三藩市香港電影節」等影展，連同早前澳門國際電影節、上海電影節等，獲邀參展數目已達7個之多。
