萬綺雯舞功渣「狂踩」馬浚偉
藝人馬浚偉日前孖萬綺雯（蚊蚊）為舞台劇《偶然‧徐志摩》排練，於劇中大跳華爾茲！二人日前首次排舞，冇舞蹈底子的蚊蚊僅練習15分鐘就跳得有板有眼，不過當音樂轉快時，蚊蚊與馬浚偉就開始招架不住。要不斷氹氹轉的蚊蚊邊跳邊大叫：「好暈呀！」其後二人分開練習，卻又「撞機」收場。蚊蚊更多次不小心差錯腳踩到馬浚偉，幸好二人都赤腳上陣才不致「重傷」，而蚊蚊就笑到碌地！
花兩個月學唱崑曲
二人相識多年，不過從未合作，馬浚偉力邀蚊蚊演出陸小曼一角，除要跳華爾茲更要唱崑曲，對蚊蚊而言極大挑戰。馬浚偉感激對方當日傾合作時連價錢都冇問，只問有否足夠時間練習，他說：「我哋8月先開始排戲，蚊蚊早兩個月就開始學唱崑曲，佢好勤力、好聰明，依家唱崑曲已經有板有眼！」蚊蚊為演舞台劇不惜推掉幾部劇集，包括深入民心的《老表，你好嘢！》第三輯，她謂：「好難得有個機會畀你學新嘢，仲可以日日練習喎，就算你畀錢出去學都未必可以！」
文：影視組