17歲芷欣甩拖葉玉卿傷心過囡囡晚晚喊
性感女星葉玉卿婚後移居美國專心相夫教子，子女日漸成長需要處理他們的感情事。現年17歲的大女胡芷欣（Victoria），兩年多前與日韓混血同學Chris初嘗戀愛，惜近日分手收場，卿卿除要處理Victoria的情緒外，更直言自己亦受打擊，比女兒雙倍傷心，晚晚垂淚，皆因Chris學業人品皆好，一早當他是半邊仔。
一代性感女星葉玉卿自1996年下嫁美籍商人胡兆明後，退居幕後到美國生活，並為胡家開枝散葉，先後誕下大女胡芷欣（Victoria）、次子胡可聰及細仔胡以聰，一家感情融洽。移居後的卿卿除協助丈夫打理生意外，亦將全副精神放在子女身上。
想不到卿卿第一個「任務」，就是要面對今年17歲的Victoria感情問題。兩年多前Victoria與日韓混血同學Chris發展甜蜜初戀，當時卿卿雖大為緊張，但仍開綠燈學會接受，更對Chris讚不絕口，惟老公則「呷醋外父」上身，坦言不希望女兒那麼年輕拍拖。怎料近日Victoria向卿卿透露與Chris分手，令卿卿更為緊張和擔心，她越洋接受訪問時說：「因為女兒要專心學業，要入大學所以難免令感情方面淡咗，個女係覺得唔想再有男朋友住，佢覺得遲早都唔一齊o架啦，因為佢哋跟住都讀大學，見面都會少咗。」卿卿指女兒與Chris雖沒有男女朋友的感覺，但大家仍是朋友，並大讚女兒冷靜和成熟：「起碼好過我！」
視如家人讚君子
原來卿卿為Victoria分手一事加倍傷心，皆因Chris學業成績良好，已視對方為半邊仔，故難以接受二人「分訊」，令她晚晚垂淚，卿卿無奈地說：「我仲傷心過佢，我真係Double Heart Break，晚晚喊呀！因為Chris好似係半邊仔咁，所以我好為佢傷心，但感覺冇咗就冇咗。」
卿卿亦有留意和關心Chris的心情，她說：「佢哋一齊超過兩年，Chris成日嚟我屋企同旅遊，建立咗感情，好似一家人咁，再加上我哋有規矩，佢哋都有守到，所以我對呢個男仔好有好感，係君子，唔係壞男仔。Chris都好慘，好難接受，我個女日日都有text（訊息）佢。我知Chris父母帶佢去見心理顧問，協助佢過渡，佢學業成績好好，我唔想影響到佢。」
老公唔贊成拍拖
Victoria經歷了「初戀失戀」一課，卿卿表現緊張和擔心，相反老公胡兆明則表現較淡然，卿卿說：「我老公就梗係冇乜嘢，佢本來都唔贊成個女拍拖。」卿卿現支持和尊重Victoria分手的決定，她說：「當年我讀完女校出嚟，到十八歲先初戀。當時我媽媽反對，但我都冇聽從，仲撲去個男仔度，當年都激親媽媽。最終我哋一年後都係分手收場，然後先知媽媽嘅說話係啱。」現在，卿卿提議完成大學課程才再次投入戀愛：「我就同佢講，唔想佢再談戀愛，自己又hurt，又hurt到人，起碼要完成咗大學先可以認真去戀愛。加上佢錯過咗幾年同朋友嘅時間，全部時間都畀晒Chris，Chris又畀晒啲時間佢，我覺得佢完全係做得啱，不過傷心係難免囉。」
文：專案組