周秀娜香閨解放 赤裸裸拍拖
周秀娜前晚與鄧麗欣及樂基兒出席煞科宴時，自爆與男友在家會全裸相對，因對方是最親密的人，可惜「女神」現時單身：「依家冇男友，冇一絲不掛嘅對象。」而鄧麗欣則直言拒與舊愛方力申再演情侶，寧願演父女！
轉戰影壇的樂基兒（Gaile），前晚與鄧麗欣（Stephy）、周秀娜及孫佳君等出席電影《女士復仇》煞科宴。一身型格打扮的周秀娜表示，其角色非常貪靚，每逢出街都會打扮得花姿招展，但返到家就變得性感，問到是否一絲不掛？她笑說：「如果同男友喺屋企可能會全裸，不過依家冇男友，冇一絲不掛嘅對象。（同男友喺屋企唔着衫？）男友已經係最親密嘅人啦！」對於在片中「被小三」，她透露與以往的拍拖經歷完全不同：「我性格唔似角色識氹男友，我係行動派，講嘢比較倔。」
Stephy冇見小方
至於Stephy則再次否認與方力申復合，直言雙方未有見面之餘，也沒有聯絡：「大家都忙，但會關注佢嘅社交網站，知佢喺外地拍緊戲。（邀請佢睇首映？）導演應該想請佢，但我同佢未喺傳媒面前一齊見面，唔好咁刻意。（如果重金邀請呢？）始終係兩個人嘅意願，短時間內都唔好，費事將感情當宣傳，演情侶都唔考慮，父女我OK，演母子就唔好喇！」並揚言現時很享受單身生活。
Gaile唔敢授徒
而首度接拍動作戲的Gaile透露，由於相隔多時沒有拍戲，加上演戲與模特兒工作分別很大，故拍攝時心情緊張，尤其是揸槍戲，因她未能模仿揸槍動作，最後要導演出動叫她放鬆。問到有否被導演責罵，她笑說：「可能佢窒緊我，但我唔知佢講咩！」談到日前的峇里之行，她透露是接受當地瑜伽導師訓練，擁有瑜伽牌的她已可以收學生，惟因欠自信而打消念頭。
文：影視組