「謀女郎」張慧雯做張家輝保鏢打鑊甘
「謀女郎」張慧雯有份演出新片《使徒行者》，戲中她扮演張家輝的保鏢，為救家輝甘願犧牲自己，上演「美女救英雄」！家輝對這位首次合作的拍檔讚不絕口：「我先後有兩場遇襲戲，佢分別出動拳頭同槍嚟救我。佢有跳舞底，身手梗係唔錯，但估唔到佢第一次拍開槍戲，已經『殺人唔眨眼』，真係前途無限，令我好深印象。」
首次演打女的張慧雯說：「我當家輝是十分重視及尊敬的前輩，也謝謝武術指導錢嘉樂的細心指導。（拍的時候有受傷？）這很難避免，但可以的，其實蠻好玩。」
認老重義氣
家輝與古天樂在戲中角色對立，卻為兄弟情而矛盾，掀起全片的高潮。日前他倆拍住上接受訪問，家輝忽然「認老」：「依家真係睇重兄弟情，後生時唔識嘢，淨係覺得義氣好重要，依家終於明白，所以拍嘅時候好投入。」古仔更認為「義氣」是做人不可缺少的東西。至於他在片中與性感韓星Clara拍了幾日戲：「佢一行出嚟，每個人心裏面都會嘩一聲。」家輝即笑言：「現場係咪飛彈、直升機出晒嚟！」此外，談到繼周潤發後圈中男星代表，家輝說：「呢個係商業世界嘅問題，作為導演，我都想有新演員承接落去。」
文：影視組
場地：唐人館
古天樂髮型/化妝：Dan Tam@O2、Carman Man@Lemongrass
張家輝髮型/化妝：Edmond Fung@HH、Midco Chu