何佩瑜開戲搵吳孟達幫拖
藝人吳孟達、何佩瑜（Jeana）及張建聲早前合作拍新片《導火新聞線》，Jeana全程對「老戲骨」吳孟達讚不絕口，直言恨與對方合作恨到口水流，她出言邀請對方參演自家新戲：「我開始寫劇本，有晒故事大綱。有角色想邀請達哥演，希望佢接受我邀請！」
何佩瑜（Jeana）早前與張建聲、前輩吳孟達合作拍攝電影《導火新聞線》，Jeana直言大感榮幸，高呼「唔夠喉」，好恨再與吳孟達續戲緣：「我恨同達哥合作恨到流口水！」近期着手寫劇本的她趁機邀請對方出演自家新戲：「我開始寫關於犯罪嘅劇本，有晒故事大綱。有角色想搵達哥演，希望接受我邀請！」吳孟達見狀笑言要Jeana多多關照。惟他坦言近年較少在幕前亮相，自爆今次大膽地冇聽醫生話去接下火爆角色：「醫生唔希望我做，想我盡量少勞氣、唔好激動同興奮，但我試吓又唔覺太辛苦，拍完畀醫生檢查又冇嘢。我定期再body check，感覺好番九成。」
張建聲靠吳孟達入戲
提到吳孟達於戲中飾演苦情爸爸，問到家有四女及一子的他有否於角色中投入父愛？吳孟達聞言即場教戲，自言不愛用「代入法」演戲：「代入嘅感情呃到觀眾，但呃唔到自己，我做演員一定要真正接觸到對象。（同家人排戲？）好少。（仔女對你工作有興趣？）我個仔有。（佢想入行?）冇，但佢有興趣去睇戲。」
身旁張建聲就稱全靠吳孟達帶他入戲：「導演安排達哥嘅戲拍咗先，佢再攞達哥嘅片畀我哋睇，多得嗰段片，我容易入戲好多。」
文：影視組
何佩瑜髮型及化妝：Veron Chan@Hair Corner、Yannes Lee@ndnco.co
張建聲髮型及化妝：sky@lamod、Yvonne.A
張建聲服裝：Scotch & Soda
場地：Penthouse