蕊蕊搵錢最實際守齋兩年
和金剛結束三年情並回復單身的歌手蕊蕊，日前到沙灘大解放，玩滑浪風帆寓意重新出發！雖然蕊蕊身邊出現不少追求者，但卻揚言兩年內守齋拒絕拍拖，對圈中人更敬而遠之，認為吸金搵銀有近身錢才最實際，以事業為重，兒女私情暫免問！
歌手蕊蕊自今年四月與金剛分手結束近三年情，日前到沙灘挑戰玩滑浪風帆，寓意乘風破浪再向人生新一頁出發！樣靚身材正、擁有34F驕人上圍的蕊蕊，回復單身後身邊的確出現不少追求者，當中更有韓國Oppa希望可以奪走其芳心，不過事業線與事業心同樣重的她，卻堅決兩年內向戀愛說不，皆因想在事業上搏殺。
蕊蕊說：「自己年紀都唔細，所以想投入工作，未來都有新方向想嘗試。（冇諗住拍拖？）未來兩年都冇打算拍拖，真係唔想諗兒女私情，想認真工作。」蕊蕊雖自爆有韓國Oppa追求，但坦言只愛本地男士：「係有Oppa追我，但我自己都偏向鍾意香港男士，就算係我都唔再同圈中人拍拖，真係怕怕啦！」
拒異性入香閨
現時重新出發的蕊蕊，除專心工作外，更已搬離昔日愛巢，雖然如此但仍大方為舊愛保留物品，蕊蕊說：「依家心情完全冇嘢，已經過咗幾個月，多謝大家關心，雖然佢啲嘢仲喺我度，但大家冇聯絡，可能佢都需要啲時間啩。」另外，蕊蕊為布置新居花了不少心思，同時更因此而弄傷手腳，她說：「我着住短褲移枱移梳化，搞到手腳都刮傷撞瘀。（唔叫啲追求者幫手？）呢啲嘢梗係自己做番啦！我唔會隨便畀任何異性上嚟屋企，我唔係咁隨便！」
文：專案組
攝：倪立煌
風帆：捕風一族