謝賢失望：唔係做我條女！
謝賢（四哥）、佘詩曼、馬國明日前為王晶監製新劇《賭城群英會》開工，當天適逢是四哥80歲生日翌日，阿佘特別準備了大蛋糕祝壽！四哥搞笑指初合作時，還以為「佘詩曼」是男人，合作過後，知道她好戲兼靚女，更笑言很想跟阿佘演情侶！
7月30日是謝賢的80大壽，子女謝霆鋒、謝婷婷為他搞了個生日飯局，一對孫仔Lucas、Quintus更送上媽咪張栢芝親手畫的畫作做禮物，逗得四哥開心不已！生日飯翌日，四哥便為王晶新劇《賭城群英會》開工，同劇的佘詩曼特別送上巨型生日蛋糕，氹得四哥笑逐顏開。
以為阿佘係男人
首次跟阿佘合作，四哥感覺超開心，但原來他完全不認識阿佘：「真係第一次同佢合作，一開始話係佘詩曼，我話邊鬼個佘詩曼，男人嚟o架？原來係靚女嚟，好開心，後生仔（指住馬國明）又係好嘢嚟，淨係記對白，都提咗我無數次。」阿佘送蛋糕，她笑着勁嗲四哥：「知道同你開工吖嘛！」四哥續說：「同佢拍真係開心到不得了，好有演技，但今次唔係做我條女幾失望，哈哈！」馬國明即搶着說：「益吓我啦！」
心痛霆鋒太頻撲
問到80大壽為何不大搞？四哥說：「80大壽好咩？我都睇佢唔起！90呀、800呀，咁先係o架嘛！其實冇所謂，同埋我真係驚得罪人，所以唔搞，請漏咗會得罪人，有乜所謂吖！」
霆鋒近年相當忙碌，但亦特地趕回港為父親慶祝大壽，十分孝心，四哥說：「佢真係忙到不得了，忙到我心都痛埋。（事前知佢會趕返嚟？）佢預咗嘅，因為佢真係一年裏面冇咩停過，每日喎！好少時間留喺香港，我都唔記得自己有個仔！（唔叫佢停吓陪多啲你？）搵銀，佢要養我呀，唔搵多啲邊夠我使！」
文：影視組