張名雅認準新娘 避談「奉子」

近日爆發港姐結婚潮,繼前港姐李雪瑩公布訂婚後,陳庭欣昨日又大爆有港姐快將結婚,原來是2012年冠軍張名雅!原本名雅打算遲些才公布喜訊,但被好姊妹「篤爆」,惟有親口承認,問到趕結婚是否有了BB?她說:「唔講住喇!」

黃智雯、陳庭欣和陳智燊等昨日宣傳無綫劇集《超能老豆》,陳庭欣被問到同屆港姐李雪瑩宣布訂婚一事,她指與對方有聯絡:「佢好似由選美開始就係呢個男朋友,好長情!(同你相反?)係囉!點解咁o架!總之宣布得就係我結婚啦!」記者繼續追問其感情事,庭欣為轉移視線,即大爆圈中另有港姐有喜事,問是否同屆港姐?她說:「唔講得,總之佢都結得急。(大肚?)我唔知,佢就嚟宣布啦!我姊妹裙都試埋喇!」

千雪心穎不知情

原來,庭欣口中快要結婚的港姐就是2012年冠軍張名雅,名雅正與圈外律師男友Joe打得火熱,早前更於社交網高調晒愛,昨日她接受本報訪問時親口承認:「男朋友求咗婚,我都應承咗,係開心嘅事,其實婚禮籌備咗好耐,佢好有計劃,好感動到我,本來冇諗住咁快講,我哋想有多啲空間。(咁快結婚係咪有BB?)BB呢啲咁長遠,唔講住喇!做好眼前啲嘢先,結婚已經好多嘢搞。」

與名雅同屆的朱千雪與黃心穎均不知情,千雪說:「佢有拍拖咩?恭喜晒!(唔知?)我完全唔知呀!」心穎則說:「我都唔知呀!有留意佢公開咗有男友,估唔到進展咁快囉!(試咗姊妹裙?)冇呀,唔會搵我啩!(港姐結婚潮冇你份?)唔會啦,我唔急!」

黃智雯:畀時間定欣

此外,智雯於活動中透露剛到英國小休十日,期間相約好姊妹胡杏兒、胡定欣相聚,對於定欣甩拖,智雯說:「佢係個積極女仔,姊妹有咁嘅決定都會支持。(分手前已知?)都係,有傾嘅!雙方需要時間復原,係會唔開心,畀啲時間啦!」

而已入紙排期結婚的陳智燊表示正忙於籌備12月的婚禮,並預計分別於英國、澳洲及香港擺酒,談到使費大,他調皮地說:「搵唔番咩?其實都會有賺,但唔多。(夠彈藥?)唔夠都要打呢場仗,不過開心又期待。」又指會趁後生生BB,與宋熙年亦有共識,寄望明年有好消息。

文:影視組