霆鋒出煮意賀謝賢80大壽
昨日80歲大壽的謝賢喜獲家人溫馨慶生！本來身在北京開工的謝霆鋒昨晚特意請假一天，即使只能留港十數小時亦不惜舟車勞頓，回家為爸爸下廚慶生，今日一早便飛返北京繼續開工，認真孝順！昨日傍晚5時多，婷婷和謝賢率先抵達霆鋒的寓所，未幾拉姑和鬍鬚Kong亦來到，其後更有人送蛋糕入屋。而婷婷更為父親特別訂製一個別出心裁的蛋糕，蛋糕上綴有多張謝賢參演過的角色造型照，並留言讚爸爸是「本世紀最酷的一位」！
汪明荃讚夠英氣
謝賢接受記者訪問時冧爆說：「去咗個仔度食飯。（佢煮咗咩餸？）佢煮啲餸我都唔知咩名，總之好食啦！（兩個孫仔都有到場陪你？）係呀！婷婷都有嚟，一家都喺度！」問到孫仔可有畫生日卡？他即笑指收到由栢芝親自下筆的漫畫作為禮物：「今次多謝孫仔嘅媽咪（張栢芝）畫畫畀我！（佢畫咗咩？）漫畫形式，係佢自己畫，我收到就開心到不得了！」此外，汪明荃上載偕謝婷婷到片場探謝賢班的照片，她大讚謝賢依然有型、有風度。
栢芝否認有新歡
另一邊廂，張栢芝最近屢傳新戀情，早前與朋友遊船河時被發現有鬍鬚男「新歡」，她澄清指該男士是為她工作多年的司機。昨日再有報道指她身邊出現了一位俊男Kurt，對方已融入其社交圈並一起玩滑浪，身為英語老師的他更不時登門造訪陪Lucas和Quintus玩遊戲，栢芝的經理人Emily受訪時再三強調栢芝仍然單身，目前以兒子及工作為先，她說：「嗰個男仔嘅女朋友係栢芝好姊妹，平時大家都一齊出嚟，多謝大家關心多謝大家咁關心栢芝，都想佢快啲搵個男朋友，將來有男朋友一定會講畀大家知。」