伍詠薇床晒「人妻線」揮低肉感o靚模
藝人伍詠薇（伍姑娘）為撐哥哥伍經衡的新書花盡心思，昨日晨早在網上素顏攬貓晒「線頭」，下午則孖住阿哥現身書展撐場，又澄清與老公練海棠感情不變，輕易揮低一班同在書展為新作拋胸造勢的模伍淑怡（YoYo）、姚紫茵（Bonnie）及葉梓嵐等，年屆47歲的伍姑娘果然堅辣！
伍詠薇昨晨上載一張在床上性感晒事業線頭的攬貓照，驟眼看似僅以毛巾或衫遮掩上身，成功引來不少留言讚索！適逢哥哥推出英文書，身為妹妹的她作巧妙安排，除了晒性感相，又預告會孖住老公練海棠到哥哥的書展攤位造勢，但由於會場附近塞車，練海棠最終只是安坐車中當司機，僅得伍姑娘與哥哥現身，她笑說：「呢期要罰佢，男人最好永遠都要罰！」問到兩口子是否外遊後回復甜蜜？伍姑娘指旅行是一早安排，對於助手帶同母親同行，她說：「一早安排o架！用個腦諗吓，我冇咁高情愫。」
同老公「好小事」
問到與老公是否已修復好關係？她說：「都冇乜事要修復，阿哥喺度，你哋唔好蝦我。（雨過天青？）冇事發生，就好似連續9日酷熱天氣咁，融化咗！多謝大家關心啦！人生咁多大事，呢啲係好小事。」而伍哥哥被問到可有向練海棠訓話？他笑說：「冇嘢啦！多謝關心。（用男人角度同佢傾？）一陣啦！」
此外，談及素顏晒事業線與愛貓合照，伍姑娘反應頗大，並開玩笑說：「你點知？你哋班狗賊吖！其實冇特別，嗰日喺屋企游完水，同貓互望合照係好難，咁助手Capture到，我當時係有浴巾，有着衫嘅，係啲家庭相同朋友分享啫！朋友仲恥笑我係咪出寫真，梗係唔係！」
YoYo唔怕被指篤數
薑愈老愈辣，47歲的伍姑娘輕露線頭，已揮低YoYo及Bonnie等為寫真集狂拋4吋事業線造勢的o靚模！昨日28歲生日的YoYo雖僅得一名粉絲撐場，但揚言寫真已賣去5千本，又自言清者自清，無懼被指篤數！同樣表示賣出5千本寫真的Bonnie即場剝褸晒身材，並透露有粉絲把她與另一位Bonnie認錯，結果捧錯場買錯寫真。
文：影視組